Футболдан Қазақстан Премьер-лигасының бесінші турындағы ең тартысты әрі қызықты ойын Алматыдағы Орталық стадионда жергілікті «Қайрат» пен «Ақтөбе» арасында өтті. Бұл бәсеке 1:3 есебімен қонақтардың пайдасына шешілді.
Өзге матчтар мынадай нәтижелермен аяқталды: «Қайсар» – «Атырау» – 1:1, «Жеңіс» – «Тұран» – 1:0, «Ордабасы» – «Қызылжар» – 1:1, «Астана» – «Тобыл» 2:2 және «Жетісу» – «Шахтер» – 1:0. Ел чемпионатының алтыншы тур ойындары 27 мен 28 сәуір күндері өтеді.
Санаулы күндерден кейін Қытайдың Шанхай қаласында садақ атудан Әлем кубогінің кезеңдік сайысы басталады. Қазақстан құрамасының бас бапкері Артем Кичкин аталған жарыста мына мергендерге сенім артып отыр: Ильфат Абдуллин, Дәулеткелді Жаңбырбай, Әлихан Мұстафин, Александр Еременко (классикалық садақ ату, ерлер), Алина Ілиясова, Гауһар Игібаева, Диана Тұрсынбек, Алуа Мұхтарханова (классикалық садақ ату, әйелдер), Сергей Христич, Ақбарәлі Қарабаев, Андрей Тютюн, Бунед Мырзаметов (блоктық садақ ату, ерлер), Әдель Жексенбинова, Виктория Лян, Елмира Раисова және Айжан Сейдахметова (блоктық садақ ату, әйелдер). Теннисшілердің әлемдік рейтингі жаңартылды. Жерлестеріміздің арасында ең үздік нәтиже әлі де Елена Рыбакинаға тиесілі. Ол WTA рейтингінде төртінші орында тұр. Рыбакина тек польшалық Ига Швентек, беларусьтік Арина Соболенко және америкалық Кори Гауффтан қалып келеді. Еліміздің екінші ракеткасы Юлия Путинцева 50-орынды еншілесе, Жібек Құламбаев 492-сатыға жайғасты. Ерлер арасында сербиялық Новак Джокович, италиялық Янник Синнер және испаниялық Карлос Алькарас алда келеді. Қазақстанның ойыншылары арасында ең үздік көрсеткіш Александр Бубликке тиесілі. Ол 18-сатыға тұрақтады. Өзге отандастарымыздың көрсеткіштері мынадай: Александр Шевченко – 59, Михаил Кукушкин – 129, Бейбіт Жұқаев – 182, Денис Евсеев – 184, Дмитрий Попко – 234 және Тимофей Скатов – 271. Бішкекте жалауы желбіреген Дүйшенқұл Шопоковтың мемориалында Қазақстанның екі боксшысы ақтық сынға дейін алқынбай жетіп, екеуі де алтын тұғырға көтерілді. 86 кг салмақтағы Аман Қазанқапов шешуші тұста Азия чемпионатының үш дүркін қола жүлдегері, қырғызстандық Еркін Әділбекұлын сүріндірсе, 75 кг салмақтағы ринг қожайыны Даниэль Әбдірахманов біздің Бақберген Әлиасқаровпен жекпе-жекке шығудан бас тартты. Швейцарияда «Романдия туры» басталды. 28 сәуірге дейін созылатын жарыста «Астананың» намысын Алексей Луценко, Харольд Техада, Игорь Чжан, Сантьяго Умба, Хенок Мулюбырхан, Даниил Марухин және Антон Кузьмин сынды велошабандоздар қорғап жатыр. 25-28 сәуір аралығында Новосібірде шайбалы хоккейден «Болашақ кубогі» деп аталатын халықаралық турнирдің жалауы желбірейді. Бұл жарыста Қазақстан, Ресей және Беларусьтің жастар құрама командалары өзара шеберлік байқасады. Күні кеше ғана Штутгартағы турнирде асқан шеберлік танытып, бас жүлдені олжалаған Елена Рыбакина бірден Испанияға аттанды. Бұл жерде тағы бір дүбірлі доданың шымылдығы түрілді. Жүлде қоры 7 877 020 долларды құрайтын жарыстың тұсаукесер кездесуінде Қазақстанның ең үздік теннисшісі WTA рейтингінде 37-орында тұрған қытайлық Юань Фэмен күш сынасады. Дәл осы Мадридтегі турнирде Александр Бублик пен Александр Шевченко да шеберлік байқасады.