Отыз жеті жастағы Оксана Өскемен қаласында дүниеге келген. Оның әкесі – татар, анасы – орыс, күйеуі – қазақ. Ынтымағы жарасқан шаңырақта қазақтың салт-дәстүрі ерекше мәнге ие.
– Әкем анамды қатты ұнатып қалып, сезімін білдірген екен. Ә дегенде атам мен апам екеуінің үйленуіне қарсы болыпты. Себебі балаларының татар қызын ғана әйелдікке алғанын қалаған. Бірақ, уақыт өте анамды олар да ұнатып, келісімдерін берген. Сенімдеріне қарай анам әулеттің ең сүйікті келіндеріне айналған. Мен – үйдің тұңғышымын. Өзімнен кейін Равиль есімді інім бар. Күйеуім Мираспен 2007 жылы қызмет бабымен жүріп таныстық. Қаладағы «Калкен ТВ» телеарнасында видеомонтажер болып жұмыс істеп жүрдім. Ол бізге оператор болып жұмысқа орналасу үшін тағылымдамадан өтуге келді. Басшылық маған «Оған камераны қалай ұстауды, жарықты қосуды, ракурсты ауыстыруды үйрет», деді. Осылайша, әріптес ретінде сөйлесіп жүрдік. 2008 жылы көңіліміз жарасқан соң кездесе бастап, 5 жылдан кейін үйлендік. Мирас – ақкөңіл азамат. Үйленгенде қазақ, татар, орыс халқының салт-дәстүрлерін сақтап, той жасадық. Беташар да болды, – дейді Оксана бақытты сәттерін еске алып.
Бүгінде интернационалды отбасы бір ұл, бір қыз тәрбиелеп отыр. Қыздары Самина он жаста, ал ұлдары Бахтияр жетіге келген. Әр мерекеге мән беретін олар жыл сайын Наурыз, Қазақстан халқының бірлігі күнін, Құрбан айт, Сабантой, Масленица, Пасха мейрамдарын ерекше атап өтеді. Балаларына тұсаукесер жасап, ұлдарын сүндетке отырғызған.
– Көктемнің шуақты мейрамында үйде ет асып, наурыз көже, бауырсақ пісіреді. Ақ дастарқан жайылып, үш ұлттың басы қосылады, емен-жарқын әңгімелесіп, көңілді кеш өткіземіз. Ән де айтылады, би де билейміз. Аналарымыз бір-бірімен өте жақын араласып кетті. Кездескен сайын құшақтасып, сыр ақтарысады. Отбасылық отырыстарда екеуі де, әкем де үнемі күліп, мәз-мейрам болады. Әкем – өте қарапайым адам. Бәріміз Димашты тыңдағанды жақсы көреміз. Оның әндері үнемі қосылып тұрады, – дейді Оксана.
Қыздары телеарнада балаларға арналған «TV-Kids» бағдарламасын жүргізеді. Сондай-ақ 2021 жылы «Наурыз Party» атты қалалық байқауға қатысып, жеңімпаз атанған. Байқауда өз өнерін көрсетіп, қазақ халқының салт-дәстүріне, тарихына қатысты сұрақтарға жауап берген.
Ал Оксана өзі бос уақытында сурет салады, фитнеспен айналысады. Мирас болса, футбол ойнағанды жақсы көреді. Айтуларынша, жыл сайын қайырымдылық акцияларына қатысады. Мысалы, 1 қыркүйекте тұрмысы төмен шаңырақтан шыққан жеті балаға оқу-құралдарын алып берген. Жалпы, ерлі-зайыпты жыл көлемінде мүмкіндіктеріне қарай мұқтаж жандарға қаржылай көмек көрсетіп, жұма күндері садақа береді.
ӨСКЕМЕН