Бұл сауалға бірден жауап беру қиын. Дегенмен күтімі жақсы болса үй жануарлары ұзақ жасайды. Айталық, төрт түліктің төресі – жылқы 30 жыл тіршілік етсе, ит 15 жылдан артық жасамайды екен.
Бірақ бірді-екілі ұзақ жасаған иттер болған. Мәселен, Мажарстанда бір қойшының иті 34 жыл жасаған. Алып жануарлардың ішіндегі ұзақ жасайтыны африка пілдері. Олар 70 жыл өмір сүреді. Сондай-ақ бегемот пен мүйізтұмсық 50 жыл тіршілік етеді. Ал маймылдар 40-50 жыл өмір сүрсе , хайуанаттар саябағында үнемі күтімде жүретін крокодил ғасыр жасайды. Тотықұс 120 жыл тіршілік кешеді. Балықтардың ішінде еуропалық жыланбалық 90 жыл жасаса, бекіре – 60, шортан – 50 жыл өмір сүреді.
Жазу машинкасы
Тарихи деректерде 1864 жылы германиялық Петер Миттерхофер жасаған машинка алғашқы жазу машинкасы саналады.
Петер оны ағаш ұстасы болғандықтан ағаштан ойып, әдемілеп жасаған. Бір қызығы, шебердің қолынан шыққан осы машинканың біреуі сақталып қалған. Қазір ол Дрезденнің техникалық музейінде тұр. Сонымен қатар даниялық Маллинг Хансен жасаған жазу машинкада алғашқылардың бірі саналады. Бұл – фабрикалық әдіспен жасалған тұңғыш машинка.
Қойлар да ақылды
Осыдан біраз жыл бұрын Кембридж институтының ғалымдары 20-дан аса жануарға зерттеу жүргізген.
Нәтижесінде, қой өзінің 50 тұқымдасының түрін есте сақтай алады деген тұжырым жасаған. Ғалымдардың айтуынша, төрт түліктің ішінде «жады мықтысы» – осы Шопан ата тұқымы. Олар адам бейнесін де ұмытпайды екен.