Мүмкін емес, бірақ шындық

Жоба жетекшісі, биотехнолог Хашем әл-Гайлидің айтуынша, «BrainBridge» тұжы­рымдамасының әрбір қадамы ғылыми зерттеулер негізінде мұқият ойластырылған. «Біз­дің мақсатымыз – жасанды интеллектінің мүмкіндігін барынша пайдаланып, медицина ғылымының шекарасын кеңейту, сондай-ақ өмірге қауіп төндіретін жағдайлармен күресу үшін инновациялық шешімдерді ұсыну. Егер тех­никалық-экономикалық негіз­де­мелер жақсы нәтиже бе­ріп, команда толық жиналса, сегіз жыл ішінде алғашқы операцияны жүргізудің жол картасын жүзеге асырамыз. Біз бірнеше жыл бұрын елес­тету мүмкін болмаған меди­циналық әдісті жасауға сенімді түрде уәде бе­ре­міз», деді Хашем әл-Гайли.

Айта кетейік, операция толығымен жасан­ды интел­лект негізінде роботтар ар­қылы жүзеге асады. Яғни қон­дырғы бір уақытта екі денеге қатар ота жасайды. Дегенмен, мұндағы басты ке­дер­гілердің бірі – трансплан­та­ция кезінде жүйке мен жұлын­ның зақым­данып қалмауы. Егер осы жерден қателессе, басын ауыс­тырған кез келген адамның өзі мойыннан төмен сал болып қалады.

Қазіргі уақытта компания осы кедергілерді еңсеру үшін әлемнің түкпір-түкпірінен ең үздік мамандарды жинап жатыр. Үдеріс мұнымен тоқтап қалмайды, жоба жетекшісінің айтуынша, бет транспланта­ция­сын жасау да жоспарланып отыр. Алғашқы тіркелген бас транс­плантациясы 1908 жылы итке жасалды, бірақ нәтиже бол­маған еді. Одан соң Доктор Вла­димир Демихов 1950 жылдары иттерге бас транспланта­циясын сәтті жасады. Бірақ ота­дан кейін жануар жиырма үш күн ғана өмір сүрді. 1970 жыл­дары ғалым Роберт Уайт май­мылдарға бас трансплан­тациясын жасады. Сегіз күн бойы жа­нуардың жүрегі соғып тұр­ға­нымен, денесін қозғалта алмады.

Осылай! Жасанды интел­лек­тінің кернеуі күннен-күнге күшейіп, сәт сайын небір жаңа­лықтар ашып жатыр. Жай жа­ңа­­лық емес: таңғалдырарлық әрі қорқынышты...

«BrainBridge» жобасының авторы бұл жүйе ем­делмей­тін қатерлі ісік, Альц­гей­мер және Паркинсон сияқ­ты ней­родегенеративті аурулар­дан зардап шегетін науқастар­ға жаңа үміт сыйлайтынын айтады.