Шосседегі велоспорттан Алматыда Азия чемпионатының шымылдығы түрілді. Елімізде тұңғыш рет ұйымдастырылып отырған дүбірлі додаға сары құрлықтың 27 мемлекетінің спортшылары қатысуда.
Аталған жарыста ел намысын Рината Сұлтанова, Махаббат Үмітжанова және Фаина Потапова сынды бұрымдылар қорғауда. Алғашқысы жекелеген сында сайысқа түссе, басқалары аралас эстафетада бақ сынайды. Топтық бәсекеде Рината Сұлтанова, Махаббат Үмітжанова, Марина Кузьмина және Анжела Соловьева өнер көрсетеді. Сондай-ақ Ақпейіл Өсім, Бота Батырбекова, Виолетта Казакова, Елизавета Склярова, Ангелина Буренкова, Евгения Заам, Екатерина Удовыкина, Милана Лебединская және Мария Елькина сынды жасөспірімдердің де тартысын тамашалаймыз.
Ерлер жарысында – Евгений Федоров (жекелеген), Глеб Брусенский, Евгений Гидич, Дмитрий Груздев және Игорь Чжан (топтық) шеберліктерін паш етуде. Андерлер арасында Андрей Ремхе (жекелеген), Николя Винокуров, Руслан Әлиев және Андрей мен Рудольф Ремхелерге сенім артып отырмыз.
– Биылғы Азия чемпионаты басқа да ірі халықаралық жарыстармен тұспа-түс келіп отыр. Сол себепті «Астананың» сапындағы велошабандаздар бұл додаға қатыспайды. Олар қарт құрлықта өтіп жатқан басқа байрақты бәсекелерде бақ сынауда. Бірақ одан жарыстың қызығы кеміп қалады деп ойлаймаймыз. Алматыдағы чемпионатқа қатысатын жерлестеріміз өздерінің шеберлігімен жанкүйерлерді қуантуға тиіс, – дейді
Қазақстан құрамасының аға жаттықтырушысы Даниил Фоминых.
Тағы бір айта кетерлік жайт, 5-12 маусым аралығында Азия чемпионатының өтуіне орай Алматыдағы кейбір көшелерде көліктердің жүру бағыты өзгереді.