Мажарстанның астанасы – Будапеште күрес түрлерінен халықаралық турнир өтіп жатыр. Осы жарыста жақсы нәтиже көрсеткен балуандар UWW рейтингінде жоғарылайды. Ал оның пайдасы Олимпия ойындарының жеребе тартылатын кезде анық сезіледі.
9 маусымға дейін созылатын дүбірлі додада Париж Олимпиадасына қатысқан балуандардың барлығы, басқа да спортшылар күш сынасады. Жарыс жолына шығатын 313 қатысушының 134-інің қоржынында жолдама бар. Грек-рим күресінен өтетін бәсекеде қазақ елі намысын Айдос Сұлтанғали (60 кг), Демеу Жадыраев (77 кг), Нұрсұлтан Тұрсынов пен Шәміл Ожаев (86 кг) және Әлімхан Сыздықов (130 кг) қорғайды. Еркін күрес шеберлерінің тартысында Азамат Дәулетбеков (86 кг), Әлішер Ерғали мен Ризабек Айтмұхан (97 кг) және Юсуп Батырмұрзаевтың (125 кг) өнерін тамашалаймыз. Әйелдер күресінен Эмма Тисина мен Марина Седнева (55 кг), Диана Каюмова мен Ирина Кузнецова (59 кг), Ирина Казюлина (65 кг) және Жәмиля Бақбергенова мен Гүлмарал Еркебаева (72 кг) бозкілемге шығады.
– Бұл Олимпиада қарсаңындағы ең соңғы сынақ. Будапештегі бәсекеден кейін қорытынды рейтинг шығарылады. Соның негізінде төртжылдықтың басты додасының жеребесі тартылады. Яғни рейтингте жоғары тұрған балуандар өзінен біршама төмен жайғасқан спортшылармен шеберлік байқасады. Бұл мүмкіндікті біз қалт жібермеуге тиіспіз. Қазіргі кезде Азамат Дәулетбековтің ғана есебі түгел. Ол рейтингте бірінші орында тұр. Қалғандарының ұпайы кем. Мажарстанда сол олқылықтың орнын толтыруға барынша күш салуға тиіспіз, – дейді еркін күрестен мемлекеттік жаттықтырушы Дастан Қанатқанов.
Естеріңізге сала кетейік, Қазақстан құрамасының қоржынында Олимпиаданың жеті жолдамасы бар. Оның төртеуін грек-рим күресінен иеленсек, үшеуі еркін күрес шеберлерінің еншісінде. Ал әйелдер күресінің өкілдеріне бірде-бір лицензия бұйырмады.