Елімізде Мемлекет басшысы Қасым-Жомарт Тоқаевтың бастамасымен «Таза Қазақстан» экологиялық акциясы өтіп жатқаны белгілі. Жұрт болып жұмыла атқарған іс-шара осы күні шын мәнінде елдік сипат алып үлгерді.
Республикалық «Таза Қазақстан» акциясы басталғалы оған 1 млн-нан аса адам қатысып, 5 мыңнан астам шара ұйымдастырылыпты. Акцияның аты айтып тұрғандай, оның мақсаты – азаматтарды өз қаласы мен ауылын, ауласын таза ұстап, көшет отырғызуға үндеу.
«Шын мәнінде, елімізді көгалдандыру, абаттандыру – үлкен мемлекеттік маңызы бар іс. Бұл бүгін шығып, ертең ұмытып кететін бірреттік науқан емес. Аталған жұмыс тұрақты түрде жүргізіледі. Туған жерімізді таза ұстауымыз керек. Бұл – жалпыұлттық мәселе», деген еді Президент.
Расында, тұрмыстық қалдықтар мен күл-қоқыс тұмса табиғатты тұншықтырып барады. Бұған зауыт-фабрикалардан шығатын улы химиялық қалдық суларды қосыңыз. Бұрыш-бұрышқа, қуыс-қуысқа көзіңіз түссе, желмен желпілдеген целлофандар мен қаудырлай ұшқан пластмасс құтылар құтыңызды қашырады. Шыны керек, шылым тұқылының да шашылып жатпайтын жері жоқ. Аспаннан бұршақ жауғандай ала жаңқа болып жатқанын көреміз. Оған да көбіміз қосқан үлесіміздің бары рас. Қаламыз да, даламыз да қоқысқа кенде емес. Қоқысты қайта өңдеп, кәдеге жаратуды қолға алғанымызға біраз жылдың жүзі болды. Бұл да жеткіліксіздеу түскені рас. Осы ретте «Таза Қазақстан» экологиялық акциясы дер шағында қолға алынған бастама екенін айта кеткен жөн.
Расында бұл бірреттік науқан емес, мұны – халықтың экологиялық мәдени санасын қалыптастыратын ұлттық идея деп түсінуге болады. Бұған Президенттің өзі зор маңыз беріп отыруы да осыдан болса керек. Өйткені сана тазармай, қала да, дала да тазармасы анық.