Өңір басшысы Ермек Көшербаев пен «Оst Fish» ЖШС басшылығының арасындағы кездесуде Зайсан-Ертіс бассейніне бекіре балығын жіберу жөнінде ұсыныс айтылған. Өткен аптада бұл іс жүзеге асып, Қара Ертіске Сібір бекіресі жіберілді. Айта кетейік, ерте кезде Қара Ертісте бекіре балығы мекен еткен.
Зайсан көлі мен Қара Ертіс өзенінің экожүйесі үшін маңызы зор шараға Шығысқа жұмыс сапарымен келген экология министрі Ерлан Нысанбаев та қатысты. Балықтандыру жұмысын облысымыздағы бекіре балығының уылдырығын және етін өндірумен айналысатын іргелі кәсіпорындардың бірі, бірегейі «Ost Fish» ЖШС қолға алған.
Аталған кәсіпорынның бас директоры Ерлан Сағидолдин Қара Ертіс өзеніне балық жіберу шарасына атсалысқан азаматтарға бекіре тұқымдасты өсірудің ерекшеліктері, оларды қорғау, жергілікті экожүйені сақтау жөнінде тарқатып айтып берді.
– Біздің кәсіпорын бекіренің үш түрін өсіреді. Оның ішінде Сібір бекіресі де бар. Биыл көктемде шаруашылығымызда технологияны жаңарту жұмыстары жүргізілген. Соның нәтижесінде жылына 500 мыңға жуық шабақ алуға болатындай инфрақұрылым құрылды. Енді шабақтарымызды Абай, Павлодар және Шығыс Қазақстан облыстарының су айдындарына жіберуді жоспарлап отырмыз, – деді кәсіпорын басшысы Е.Сағидолдин.
Оның айтуынша, бүгін Марқакөл мен Зайсан аудандарын бөліп жатқан Қара Ертіс өзеніне Сібір бекіресінің бір жасар 500 дарағы жіберілді. Балықтардың әрқайсысының салмағы 1,5 келіге дейін тартады. Демек оларға бұл суларды мекен ететін жыртқыш балықтардан келер қауіп жоқ.
Көппен бірге Сібір бекіресінің тарихи мекеніне оралуына куә болған Экология министрі Ерлан Нысанбаев: «Бұл – өте құптарлық бастама. Себебі Сібір бекіресі Зайсан мен Ертісті ежелден мекендеген. Алайда өткен ғасырдың 50-60-жылдарындағы су электр стансаларының салынуы әдетте Сібір мен Алтай арасында өрлеп-құлдап жүретін балықтардың жоғары өрістеуіне тосқауыл болған. Енді, міне, бұл проблема да шешімін тапқан секілді.
Сібір бекіресін Зайсан бассейніне, Қара Ертіске жерсіндіруді көздеп, бұл бағытта батыл әрекет еткен азаматтарға еңбектеріне тек сәттілік тілеймін. Министрлік тарапынан бұл бастамаға үн қосып, қолдау білдіруге дайынбыз. Бұл бағыттағы жұмыстар алдағы уақытта жалғасын табады», деді.
Сонымен қатар сала басшысы қазір балық өсіремін деген шаруашылықтарға мемлекет тарапынан жан-жақты қолдау болатынын айтып сендірді.
Шығыс Қазақстан облысы