Биыл Маңғыстау облысында республикалық «Таза Қазақстан» экологиялық акциясы аясында 25 мың тоннаға жуық қоқыс шығарылды, сондай-ақ Ақтау қаласы маңындағы «Өндірістік аймақта» 35 гектар қоқыс үйіндісі тазаланады. Акцияға атсалыспаған ұжым жоқ, қаншама күш-қуат жұмылдырылды, алайда араға апта салмай жатып тазаланған жерге тасталған қоқысты көргенде көңілің құлазып сала береді...
Мысалы, аталған акция аясында «Отпантау» тарихи-мәдени кешеніндегі тазалық жұмыстарына «Таным» табиғи ресурстар басқармасының ұйымдастыруымен «Жасыл ел» жасағы араласып, жастар тазалық жұмысына белсене кірісті.
«Тазалық жұмысы қарқынды жүріп жатыр. Алғашқы аялдама — «Өндірістік аймақ-3». Тазалық жұмысы екі санатта жүргізіледі. Біріншісі, арнайы техниканың күшімен және арнайы коммуналдық қызметкерлердің қолдауымен жүзеге асырылады. Бұл жұмыстарға 13 арнайы техника мен 10 қызметкер жұмылдырылып, орта есеппен, 25 мың тонна қоқыс шығарылды. «Өндірістік аймақ – 3», «Авто бипэк» маңында және «Өндірістік аймақ - 3,23», «Үлкен Оймаша», «ПК Урожай» маңында заңсыз тасталған қоқыс үйінділерін тазалау жұмыстары жүргізілді», дейді Ақтау қалалық ТКШ бөлімінің басшысы Жанболат Жақыпов.
Жұмыс жүріп жатыр, алайда тазалықтың сақталуы қиындық туғызып тұрғанын жасырып қажеті жоқ. Бұл тұрғындардың, қонақтардың, туристердің, жалпы демалушылардың жеке мәдениетіне қатысты жағдай. Ал Маңғыстау облысы аталған акция аясында алғаш рет қоршаған ортаны қорғауға өз үлесін қосушылар арасында «Таным» сыйлығын тағайындады.
Маңғыстау облысы