2024 жылдың шілде айынан бастап елімізде мемлекеттік қызметке іріктеу, дәрі-дәрмек таңбалау, несие беру ережелері, темекі, байланыс қызметі мен сұйытылған газдың қымбаттауы күтіледі, деп хабарлайды Egemen.kz Tengrinews.kz-ке сілтеме жасап.
Қазақстанда мемлекеттік қызметшілер жаңа әдіспен іріктеледі
Мемлекеттік қызмет істері агенттігінің мәліметінше, мемлекеттік қызметке іріктеудің ашық өтуін қамтамасыз ету мақсатында былтыр e-Qyzmet.gov.kz сыртқы интернет-порталы іске қосылып, іріктеудің жаңа ережелері әзірленді.
Қазір порталға 22 мемлекеттік орган қосылды. 1 шілдеде жүйе 22 мемлекеттік органда қосымша енгізіледі.
Жаңа жобаның ерекшелігі - азаматтар кез келген уақытта және интернетке қолжетімді кез келген жерден онлайн режимінде байқаудың барлық кезеңіне қатыса алады.
Несие берудің жаңа ережелері
Биыл 1 шілдеден бастап тұтынушылық несие 90 күннен астам кешіктірілсе, несие беруге тыйым салынады.Сондай-ақ коллекторларға қарыз беруге екі жылдық мораторий енгізіліп жатыр. Осы кезеңде несие берушілер мерзімі өткен несиелерді коллекторларға бере алмайды. Қарыздары коллекторларға берілген қарыз алушыларды қолдау үшін 2024 жылғы қазаннан бастап коллекторлардың берешекті реттеу рәсімдерін жүргізу міндеті енгізіледі.
Сонымен қатар 1 шілдеден бастап азаматтар жұбайының келісімінсіз несие ала алмайды.
Интернет пен ұялы байланыс тарифтерінің өсуі
«Қазақтелеком» 1 шілдеден бастап мұрағат желісінің 51 тарифтік жоспары бойынша тарифтердің көтерілгенін хабарлады. Бұл үйдегі интернет пен ұялы байланыстың пакеттік қызметтеріне арналған мұрағатталған тарифтік жоспарларына қатысты.
Күдікті ақша аударымдарын бұғаттау
Ұлттық банк қаржылық алаяқтықпен күресу үшін Алаяқтыққа қарсы орталық құрылғанын хабарлады. Алаяқтыққа қарсы орталық 22 шілдеден бастап - цифрландыру мәселелері туралы тиісті заң күшіне енген сәттен бастап күдікті ақша аударымдарына тосқауыл қоюды бастайды.
Жүйенің негізгі міндеті - азаматтарды алаятардан қорғау. Күдікті ақшалай транзакцияларға тосқауыл қойылады.
«Алаяқтыққа қарсы орталыққа барлық банктердің, төлем ұйымдарының, Ішкі істер министрлігінің, Қаржы мониторингі агенттігінің, Қаржы нарығын реттеу және дамыту агенттігінің, Бас прокуратураның, ұялы байланыс операторларының ақпараттық жүйелері қосылады. Бұл функция 2024 жылғы шілдеде толығымен енгізіледі деп жоспарланған», деді Премьер-министр Олжас Бектенов.
Темекі бағасының өсуі
Қаржы министрлігінің бұйрығына сәйкес, 20 (жиырма) фильтрлі, фильтрсіз сигаретке, папиростарға, сигариллаларға және қыздырылатын темекісі бар бұйымдарға: 2024 жылғы 1 шілдеден бастап 2024 жылғы 31 желтоқсанды қоса алғанға дейін 820 теңге; 2025 жылғы 1 қаңтардан бастап 870 теңге болады.
Сұйытылған газдың жаңа бағасы
1 шілдеден бастап Қазақстанда сұйытылған газ бағасы өседі деп жоспарланған.
Қазақстанның облыстары мен қалаларында жаңа бағалар мынадай деңгейде белгіленеді:
Астана – 84 теңге; Алматы – 89 теңге; Ақтөбе облысы – 59 теңге; Атырау облысы – 59 теңге; Ақмола облысына – 84 теңге; Алматы облысына – 89 теңге; Шығыс Қазақстан облысына – 84 теңге; Жамбыл облысына – 78 теңге; Батыс Қазақстан облысына – 70 теңге; Қостанай облысына – 84 теңге; Қызылорда облысы – 70 теңге; Қарағанды облысы – 84 теңге; Маңғыстау облысы – 59 теңге; Павлодар облысына – 81 теңге; Солтүстік Қазақстан облысына – 89 теңге; Түркістан облысына – 70 теңге; Шымкент – 70 теңге; Абай ауданы – 84 теңге; Жетісу облысына – 84 теңге; Ұлытау облысы – 84 теңге.Министрлік газ бағасын қайта қарау қажетін бірнеше себептермен түсіндірді. Атап айтқанда, бұл шешім табиғи газ өндірудің тиімсіздігіне байланысты.
Энергетика министрлігі Қазақстан ТМД елдеріндегі газ бағасының ең төмені – 54 теңгеден 86 теңгеге дейін екенін, ал Ресейде бір литр газдың бағасы - 132 теңге, Әзербайжанда – 171 теңге, Тәжікстанда – 273 теңге екенін атап өтті.
Дәрілерді таңбалау
2024 жылғы 1 шілдеден бастап Қазақстанда барлық дәрілік затты міндетті түрде таңбалау және қадағалау енгізіледі. Дүниежүзілік денсаулық сақтау ұйымының мәліметінше, дамушы елдерде дәрі-дәрмектің әрбір 10-шы пакеті жалған. Елімізде контрафактілік дәрілердің айналымы 10-12 пайыздан асады. Бұл тек экономикалық мәселе емес, ұлттың өмірі мен денсаулығына тікелей қауіп төндіреді.
Зергерлік бұйымдарды цифрлық таңбалау
Зергерлік бұйымдарды сандық таңбалау 1 шілдеден бастап зергерлік бұйымдарға міндетті цифрлық таңбалау енгізіледі: оларға тауар белгісі, мекен-жайы, бұйымның атауы, артикул, сынама, масса, өлшемдер, кірістірулер туралы ақпарат көрсетілетін арнайы белгі қоса беріледі. Сондай-ақ сараптама актілерін цифрландыру және оларды цифрлық таңбалаумен байланыстыру жоспарланып жатыр.
Цифрлық таңбалау және тауарларды қадағалау жүйесінің басты мақсаты - Қазақстандағы тауар айналымын ашық ету.
Зейнетақы жарналарын төлеу ережелеріндегі өзгерістер
Үкімет қаулысы бойынша міндетті зейнетақы жарналарын, міндетті кәсіптік зейнетақы жарналарын, жұмыс берушінің міндетті зейнетақы жарналарын төлеу қағидаларына өзгерістер мен толықтырулар енгізіледі.
Тиісті ережелерге өзгертулер ISO 20022 қаржылық хабарламалардың халықаралық стандартына көшумен байланысты.
Демалыс
2024 жылғы шілдеде ел азаматтары жыл сайын 6 шілдеде тойланатын Астана күнін мерекелеудің арқасында тағы бір демалыс күні қосылады. Бұл күн - мемлекеттік мереке және биыл ол сенбіге түсіп тұр, сондықтан мереке 8 шілде дүйсенбіге ауыстырылды. Осылайша, аптасына бес күн жұмыс істейтіндер қатарынан үш күн демалады: 6, 7 және 8 шілде.
Аптасына 6 күн жұмыс істейтіндер үшін 8 шілде әдеттегі жұмыс күні болады.
Ауа райы
«Қазгидромет» шілдеде ауа райы салқындайтынын айтты. Республиканың басым бөлігінде өткінші жаңбыр жауып, найзағай ойнайды, екпінді жел соғады, бұршақ жаууы мүмкін.
Негізгі температуралық фон жоғары болады деп болжанады: батыс және оңтүстік облыстарда: +30+38, кей күндері термометр 40-тан 45 градусқа дейін жетеді. Қазақстанның солтүстігінде, орталығында және шығысында ауа температурасы +25+38 градус шамасында болады деп болжанып отыр.