Футболдан Еуропа чемпионатының ширек финалдық ойындары шиеленісті өтті. Тіпті финалдық бәсекеге бергісіз тартыс болды деп бағалайтындар да бар. пионатының ширек финалдық ойындары шиеленісті өтті. Тіпті финалдық бәсекеге бергісіз тартыс болды деп бағалайтындар да бар.
Десе дейтіндей, футбол саңлағы Криштиану Роналдудың өзі пенальтиден ғана гол тоғытып, алтыншы рет қатысқан Еуропа чемпионатының ширек финалынан қайтты. Франция мен Португалия құрамасы 2016 жылғы Еуропа біріншілігінің финалдық бәсекесінде тоқайласқан. Дүние кезек, сол тартыста Эдердің 109-минутта соққан голы Португалия құрамасына Еуропа чемпионатының ат басындай кубогін ұстатқан-ды. Бұл жолы таразының ауыр басы Франция құрамасына қарай ауды. Негізгі уақытта да, экстра таймда да тең түсіп, (0:0) пенальти сериясында 3:5 есебімен француз футболшылары жартылай финалға шықты. Пенальти сериясында көпшілік Португалия құрамасының алға озарына шүбәсіз сенді. Себебі 8/1 финалдық тартыста Словения құрамасын Португалия футболшылары пенальтиде ығыстырса, словениялық Йосип Иличи, Юре Балковец, Беньямин Вербичтің тепкен добын Португалия құрамасының қақпашысы Диого Кошта қайтарып сұңғылалық танытқан. Бұл жолы Коштаның көрегендік қасиеті жүрісінен жаңылды. Франция құрамасының бес футболшысы Диогоның қақпасынан саңылау тапты.
Франция құрамасының қорғаушысы Вильям Салиба финалдық тартысқа шығатынына бек сенімді екенін жеткізді. Матчтан кейін пікір білдірген қорғаушы құрама мүшелерінің бір үйдің баласындай ұйымшылдық танытқанына разылығын айтты. «2022 жылы Қатарда өткен әлем чемпионатының финалында Аргентина құрамасына пенальти сериясында жол бердік. Осы жеңіліс бізді есейтті, нәтижесі міне, жартылай финалға жеттік», деді 67-минутта Антуан Гризманды алмастырып алаңға шыққан шабуылшы Усман Дембеле. «Пенальти – қашанда лотерея. Бірде бізге ауған жеңіс француз футболшыларына байланды. Біз Еуропа чемпионатының ширек финалына дейін қалай ойнадық, деңгейіміз қаншалықты өсті дегенді талдау маңызды», деді Португалия құрамасының қорғаушысы Рубен Диаш.
Испания құрамасы Еуропа чемпионатының жартылай финалына шығар жолда Германия футболшыларын 2:1 есебімен жер соқтырып кетті. Бұл матчтың да дақпырты мен дауы біразға дейін басыла қоймасы анық. Әсіресе тартысқа қазылық еткен Энтони Тейлор Жамал Мусиаланың соққысын қолымен қаққан Марк Кукурельяның әрекетіне пенальти тепкізбеуі талай жерде айтылатыны сөзсіз.
Швейцария құрамасы ширек финалда Англия футболшыларына пенальти сериясында есе жіберді. 75-минутта Ембола есеп ашып, Швейцария құрамасы алға шыққан, 80-минутта Сака таразы басын теңестіріп жеңілістен құтқарып қалды. Экстра таймда да нәтиже өзгерген жоқ. Пенальти сериясында 5:3 есебімен ағылшын футболшылары басым түсті. 2021 жылы өткен Еуропа чемпионатының ширек финалында да Швейцария құрамасы Испания футболшыларына пенальтиден есе жіберген еді.
Түркия құрамасы Нидер- ланд футболшыларына 2:1 есебімен жол берді. 35-минутта Арда Гүлердің пасын голға ұластырған Ақайдын Сәметтің шабуылынан кейін түрік футболшылары басымдыққа ие болғанымен, тәжірибелі саңлақтардың біліктілігіне арқа сүйеген Нидерланд құрамасы жеңісті жұлып әкетті. 70-минутта Де Врей Стефан таразы басын теңестірген. 76-минутта қарсыластың шабуылына тосқауыл қоюға ұмтылған Мерт Мөлдір өз қақпасына гол соғып алды.
Түркия құрамасының бас бапкері Винченцо Монтелла түріктің жас қырандарын шарыққа ұстағандай қайрап, шыңдаудан өткізді. Жиырмаға жасы жетпеген Арда Гүлер қалай түледі. Өзгүр, Барыс Йылмаз, Ахмеджан Каплан, Семих Қылышсой сынды футболшылары 20-дан енді асқан. Демек Түркия құрамасының дәуірлейтін шағы алда. Екі жылдан кейін әлем чемпионатында жігіттер жасын ойнататын деңгейге жететінін көрсетті.