Мәжіліс депутаты, «Amanat» партиясы фракциясының мүшесі Нұртай Сабильянов Абай облысына сапары аясында Үржар ауылында қоғамдық қабылдау өткізді.
Қоғамдық қабылдау жұмысы барысында азаматтарға құқықтық кеңестер беріліп, әлеуметтік мәселелердің заңнамалық нормалары түсіндірілді. Кездесу барысында ауылдағы қордаланып қалған бірқатар проблема көтеріліп, түйінді мәселелер талқыланды. Тұрғындардың бірі жол мәселесін қозғаса, өзгелері өңірдегі медициналық көмекті жетілдіру керектігін алға тартты.
Ауыл ақсақалы Пітәт Ахметжанов өңірдегі ауылдардың әкімшілік бөлінісін қайта қарауды сұрады. Нұртай Сабильянов бұл мәселенің ең алдымен жергілікті жерде талқылануға тиіс екенін атап өтті. Тұрғындардың ұсынысы облыс деңгейінде қолдау тауып жатса, мәселе Үкіметке де жетеді.
«Бұған дейін де елді мекенді ауданға қосу мәселесі жан-жақты әрі жүйелі түрде қарастырылған. Бұл мәселені жергілікті билік пен мәслихат бірлесіп шешуге тиіс. Жергілікті атқарушы орган тиісті шешімін қабылдағаннан кейін оны облысқа жібереді. Егер облыс қолдаса, мәселе Үкіметке жолданады. Тек содан кейін ұсыныс енгізіледі. Ал Қарақол су қоймасына келер болсақ, бұл мәселе Мәжілісте көтерілген. Ең алдымен жобалық сметалық құжаттар жасалды. Одан кейін барып қана оған күрделі жөндеу жүргізіледі. Бұл су қоймасына кезінде бөлінген қаражат дұрыс игерілмеген. Енді бұл мәселе назарымызда болады», деді депутат.
Кездесуге Мәжіліс депутаттарымен қатар жергілікті билік өкілдері де қатысты. Тұрғындардың шағымын ауыл әкімі де өз бақылауына алып, тиісті жұмыстарды атқаруға уәде берді.