Германияда бір айға жуық футбол мерекесін сыйлаған Еуропа чемпионатының жартылай финалдық матчы тартысты өтті. Испания құрамасы Франция футболшыларын 2:1 есебімен тұқыртып, құрлық додасының финалдық тартысына жетті. Сайдың тасындай іріктелген жастардан жасақталған Испания футболшылары құрлық аламанында рекордтық нәтиже тіркеумен де көпті таңғалдырып келеді.
Испания ұлттық құрамасының бас бапкері Луис Де ла Фуэнте бұл біріншілікке негізінен түбіт мұрты енді тебіндеп келе жатқан жастарды қосты. Әу бастан-ақ Еуропа чемпионатының финалдық додасына қосылған құрамалардың ойыншыларын саралаған сәуегей біткен Испанияның жас футболшыларына аса сенім білдіре қойған жоқ. Бірақ топтық кезеңдегі барлық матчты айқын ұтып, плей-оффта қарсы түскен құрамаларды пенальти сериясына жеткізбей шідерлеген де – Испания құрамасы. бапкері Луис Де ла Фуэнте бұл біріншілікке негізінен түбіт мұрты енді тебіндеп келе жатқан жастарды қосты. Әу бастан-ақ Еуропа чемпионатының финалдық додасына қосылған құрамалардың ойыншыларын саралаған сәуегей біткен Испанияның жас футболшыларына аса сенім білдіре қойған жоқ. Бірақ топтық кезеңдегі барлық матчты айқын ұтып, плей-оффта қарсы түскен құрамаларды пенальти сериясына жеткізбей шідерлеген де – Испания құрамасы.
Бұл Еуропа чемпионатының додасында Испания футболшыларының екпіні үй жығардай, қайраты тас үгердей. Жартылай финалдық тартыста Луис Де ла Фуэнтенің шәкірттері Франция футболшыларының адымын аштырмады. Матчтың 9-минутында гол соққан Коло Муанидің нәтижесінен кейін де француздар басымдықты ұстап тұра алмады. 16 жастағы Ламин Ямаль 21-минутта есепті теңестіріп берсе, Даниэль Ольмо 25-минутта жеңіс голын соқты. Ямаль Еуропа чемпионатының тарихында гол соққан ең жас ойыншы атанды. Екі күннен кейін ол 17 жасқа толады. Бұл екі құраманың жолы соңғы рет 2021 жылы Ұлттар лигасының финалында түйісіп, 2:1 есебімен француз футболшылары басым түскен болатын.
Испания құрамасы D тобында өткізген үш ойында да жеңіске жетіп, 9 ұпаймен көш бастады, 8/1 финалда Грузия құрамасын ірі есеппен еңсерді, ширек финалда Германия футболшыларын экстра таймда жеңді. Жартылай финалда Франция құрамасын ығыстырды. 1984 жылы өткен Еуропа чемпионатында Франция футболшылары 14 гол соққан еді. Биылғы құрлық аламанының финалына шыққанға дейінгі кезеңде испан футболшылары қарсыластардың қақпасына 13 гол тоғытты. Демек Еуропа чемпионатының жылнамасын жаңартатын күн де қашық емес.
Еуропа чемпионатының финалына Англия құрамасы да шықты. Жартылай финалда Нидерланд футболшыларын 2:1 есебімен жеңді. 78-минутта Симонстың алыстан тепкен добын Англия құрамасының қақпашысы Пикфорд қайтара алған жоқ. Ағылшын құрамасының капитаны Харри Кейн 18-минутта таразы басын теңестірген. Матчтың төрешісі 2-таймға қосқан қосымша уақытта (90+1) Уоткинс жеңіс голын соқты.
2021 жылы Еуропа чемпионатының финалдық тартысы Лондонда өтіп, Италия құрамасы Англия футболшыларынан пенальти сериясында 3:2 нәтижесімен басым түскен еді. Қақпашы Джордан Пикфорд бастап, Кайл Уокер, Джон Стоунз, Киран Триппьер, Джуд Беллингем, Харри Кейн сынды футболшылар Еуропа чемпионатының финалдық додасында екінші рет ойнағалы отыр.
Еуропа чемпионатының финалдық матчы 14 шілде күні Германияның Берлин қаласындағы Олимпиадалық стадионда өтеді.