Оңтүстік Кореяда астаналық суретші, графикалық дизайнер Бақыт Шүкетаевтың картиналарының көшірмелері көрсетілді. Шебердің туындылары Хангук шет тілдер университеті ұйымдастырған көрмеге қойылды. Картиналарды аталған жоғарғы оқу орнының профессоры Чу Ён Мин Сеулге алып келген.
Іс-шара шаһардың танымал тарихи орталығында – ХанОк дәстүрлі корей үйінде өткен. Айта кетейік, бұл – Оңтүстік Корея астанасында Еуразия елдері суретшілерінің алғашқы көрмесі. Ұйымдастырушылар іс-шараны жыл сайын өткізуге ниетті екендіктерін айтты.
«Бұл көрме арқылы біз Еуразия мен Оңтүстік Корея өнерінің тығыз байланысын көрсетіп, мәдени алмасуды жандандыруды қалаймыз. Корей кескіндемесіндегі негізгі бояулар қазақстандық суретшінің туындыларында да бар», дейді профессор Чон Бо Ын.
«Мен Астанада бір рет болдым. Бүгін қазақ суретшісінің картиналарымен танысып, кейін Қазақстанға арнайы барып, суреттегі әсем жерлерді өз көзіммен көрмекпін. Бүркіттің суреті Қазақстан туындағы бейнені есіме түсірді. Қазақтың ою-өрнектері де өте әдемі», деп тамсанды көрмеге келген көрермен. Айта кетейік, сурет көрмесі жергілікті халықты Еуразия елдерінің мәдениетімен таныстыруды мақсат етіп отыр.