Жақында Мемлекет басшысы Қасым-Жомарт Тоқаев «Жергілікті мемлекеттік басқару және өзін-өзі басқару туралы» заңына қол қойды. Осы заң шеңберінде еліміздегі 17 облыс және 3 республикалық маңызы бар қаланың өңірлік нышандарын нормативтік-құқықтық деңгейде ресми бекіту жоспарланып отыр, деп жазады Egemen.kz.
Бұған дейін өңірлік рәміздерді рәміздердің сипаттамасын әзірлеу мен оларды пайдалану тәртібін айқындау құзыреті Астана және Алматы қалаларының мәслихаттарына ғана қолжетімді болды. Ал өзге аймақтарда бұл мәселе нормативтік-құқықтық актілер деңгейінде бекітілмеген еді. Осы олқылықтың салдарынан жергілікті әкімдер өңірлік рәміздердің сипаттамасын әзірлеу мен пайдалану тәртібін өздері айқындап келген.
Өңірлік рәміздерді әзірлеу жүйесін ретке келтіру бойынша «Үлгілік қағида» дайындалғанын айтады. Қағида мәтіні 23 шілдеге дейін қоғамдық талқылау үшін «Ашық НҚА» сайтында орналастырылды.
Тілшіміз Жадыра Мүсілім геральдист мамандардың тақырыпқа қатысты пікірі мен ұсыныстарын тыңдады.
Мәселен, геральдист Айдын Рысбекұлы «Жергілікті мемлекеттік басқару және өзін-өзі басқару туралы» заңға енген «өңірлік нышандар» терминін «өңірлік рәміздер» деп өзгертуді ұсынды.
Жалпы «өңірлік рәміздерді» бекітудің маңыздылығы мен оған қойылатын талаптарды газетіміздің бүгінгі санында жарық көрген Жадыра Мүсілімнің «Өңірлік төлтаңба асқақ болуы шарт» мақаласынан оқи аласыздар.