Қайырымдылықты дәріптеген бал

Мазмұнды іс-шараның мақса­ты – «Өркен» білім беру гранты­на үміткерлер арасында резерв­­тік тізімде тұрған ауыл мектебін­де оқитын, соның ішінде әлеумет­тік жағынан аз қамтылған отбасыдан шыққан 7-сыныптың бір оқу­шысына NIS түлектері атынан Зият­керлік мектепте оқуға қажетті қаражат жинау. Былтыр Түркіс­тан облысы Шәуілдір аулының оқушысына дәл осындай грант беріліп, оның оқу ақысын толық төлеу үшін екі қайырымдылық балы өткен еді. Биыл бұл оқушы Шым­кент қаласындағы химия-био­­логия бағытындағы Зияткерлік мек­тептің оқу жылын үздік бітірді.

Қайырымдылық балда сөз ал­ған «Назарбаев Зияткерлік мек­тептері» дербес білім беру ұйы­мының басқарма төрағасы Әнуар Жанғозин іс-шараның маңызына тоқталып, оған келіп қатысқан түлектерге ризашылығын білдірді.

– «Alumni NIS» қауымдастығы – біздің үлкен байлығымыз. Біз тәжірибе алмасып, бір-бірімізді қолдау арқылы биік белеске қол жеткізе аламыз. Біз – үлкен отбасымыз, сондықтан біздің күшіміз бірлікте екенін естен шығармайық. Әлемді ізгілік, мейірімділік, қайы­рымдылық арқылы жақсы жаққа өзгертуге болады. Бүгінгі бал тек қайырымды іс жасау ғана емес, сонымен бірге тамаша кездесу алаңы дер едім. Осы залға түрлі саланың өкілі жиналды. Сондықтан бұл іс-шара бәрімізге жылы шуағын төгіп, жаңа мүмкіндік сыйлайтынына сенемін. Шын мәнінде, Зияткерлік мектептер сіздерге көп мүмкіндік берді. Сапалы білім мен адами асыл құндылықты бойларыңызға сіңірді. Енді білім алған мектеп­теріңізді, оқушыларды жан-жақ­ты қолдайтын уақыт келді, – деді ұйым­ның басқарма төрағасы.

Іс-шара барысында Назарбаев Зияткерлік мектептері мен «Smar­TestPrep» компаниясы арасында өзара ынтымақтастық туралы меморандумға қол қойылды. Екіжақты келісім Зияткерлік мек­теп оқушылары үшін жаңа мүм­кіндік береді. Алдағы уақытта жүл­де қоры 3 миллион теңге болатын байқау өткізілмек. Сонымен бір­ге оқушыларға емтиханға дайын­далу үшін шағын курстан (IELTS/SAT/NUET) өту, шетелде оқу және т.б. қызмет түрі тегін ұсынылады.

Қайырымдылық балға Бірік­кен Ұлттар Ұйымы, Парламент Сенаты, Ұлттық банк, «Астана» Халықаралық қаржы орталығы, KPMG, «Ernst & Young», «Deloitte», «Binance», «Alstom», «Dyson», «PricewaterhouseCoopers», «Kaspi.­kz», «Beeline» және бас­қа да жетекші отандық және халық­ара­лық ұйымдар мен компанияларда қызмет ететін, сондай-ақ «Ivy League» мен QS рейтингіндегі үздік жоғары оқу орындарында оқитын түлектер қатысты.

Олардың арасында Алматы қаласындағы физика-математика бағытындағы Зияткерлік мек­тептің түлегі Аделина Луцен­ко да бар. Бүгінде ол Азаматтық авиа­ция академиясының ұшқыш-нұсқаушысы болып жұмыс істейді. Биыл көктемде Аделина нұсқаушы және студент қыздардан құралған оқу ұшағын әуеге көтерді. Бұл оқу тәжірибесі тарихында алғаш рет болды.

– Қайырымдылық балы – тек достарымызбен кездесу ғана емес, түлектер қауымдастығы­ның бас­тамасын қолдауға бағыттал­ған ерекше іс-шара. Мен NIS-те сапалы білім алдым. Сондықтан бұл білім ошағы оқуға ынталы, бі­рақ қаржылық қолдауды қажет ете­тін балаларға қолжетімді болға­нын қалаймын. Біздің әрқайсы­мыз өскелең ұрпақтың дамуына өз үлесімізді қосуға тиіспіз. Мен осындай маңызды істің басы-қасында болғанымды мақтан етемін, – деді ол.