Облыс орталығы Семей қаласында «Digital Abai: жаңа замандағы білім беру» атты тақырыпта педагогтердің дәстүрлі тамыз конференциясы өтті. Онда білім беру ұйымдарында атқарылған жұмыстарға талдау жасалып, жаңа оқу жылына дайындық мәселелері пысықталды. Биылғы жиында өңірдің білім беру жүйесін цифрлық трансформациялауға басымдық берілді. Пленарлық сессия барысында цифрлық көрме ұйымдастырылып, онда студенттер мен оқушылардың стартап-жобалары, STEAM-білім беру саласындағы әзірлемелер, сондай-ақ оқыту үшін жайлы және қауіпсіз цифрлық ортаны құрудың жаңа жобалары ұсынылды.
Пленарлық сессияға білім беру ұйымдарының педагогтері мен басшылары, психологтер, әдіскерлер мен әдістемелік кабинеттердің меңгерушілері, жергілікті атқарушы органдардың өкілдері, еңбек ардагерлері қатысып, олар цифрландырудың үрдістері мен білім беру саласында жасанды интеллектіні қолдану туралы өзекті мәселелер қозғалды.
Абай облысы білім басқармасының басшысы Нұржан Ахметқалиев білім беру жүйесіндегі цифрландырудың маңызына тоқталды.
– XXI ғасыр – цифрлық технология дәуірі. Қазір елімізде «Цифрлық Қазақстан» мемлекеттік бағдарламасы аясында көптеген жұмыс жүргізіліп жатыр. Ел экономикасында да цифрландыру маңызды рөл атқарады. Сондықтан оқушылардың цифрлық дағдыларын дамыту мақсатында бірқатар іс-шара іске асырылды. Сонда да цифрлық технологиялар мен құралдарды тиімді пайдалану арқылы білім беру ұйымдарының жұмысын жетілдіру жөнінде нақты ұсыныстар керек, – деді ол.
Пленарлық сессия барысында білім беруді цифрландыру саласындағы жетекші сарапшылар баяндама жасады. Мәселен, Оқу-ағарту министрлігі Ы.Алтынсарин атындағы Ұлттық білім академиясының орта білім мазмұны институтының директоры, PhD Сейфолла Смайылов «Цифрландыру жағдайында орта білім берудің сапасы мен қолжетімділігін арттыру» тақырыбын қозғаса, «EdCrunch» жаңа білім беру технологияларының негізін қалаушы әрі бағдарламалық директоры Нұрлан Қиясов жасанды интеллектінің жетістіктерін сөз етті. Ал «Steam.kz» жобасының негізін қалаушы Айдын Түсіпжанов «STEAM-білім беруді дамыту мүмкіндіктерін» талқылап, «Ustem robotics» қорының халықаралық қатынастар департаментінің директоры Нұрлыбек Нұржанов «Цифрлық трансформация жағдайында педагогтер мен білім алушыларға қолайлы орта қалыптастыру маңыздылығы: жетістіктер мен жеңістер» атты тақырыпта баяндама жасады. «Abai it Valley» технологиялық кластерінің директоры Бауыржан Наурызбаев Абай облысының студенттері мен оқушыларының стартап-жобаларын дамытудың мүмкіндіктері мен алғашқы нәтижелері туралы баяндады.
Тамыз кеңесі аясында «Мектепке дейінгі білім берудегі инновациялар», «Жасанды интеллектіні орта білім беру жүйесіне интеграциялау», «Техникалық және кәсіптік білім беру жүйесіндегі цифрландырудың қазіргі басымдықтары», «Ауылдық мектептерде оқыту процесін цифрландыру» секілді тақырыптарға бөлінген секция отырыстарына қатысқан мамандар өз жұмыстарын қорытындылады.
Сондай-ақ келелі кеңесте 2023–2024 оқу жылының қорытындысы бойынша Абай облысындағы үздік білім беру ұйымдары мен педагогтері марапатталды. Айталық, Аягөз ауданының қалалық қазақ мектеп-лицейіне – 28 млн теңге, Семей қаласындағы №16 Төлеубай Аманов атындағы ЖОББМ – 10 млн теңге, Жарма ауданы Георгиевка орта мектебі – 10 млн теңге, Бесқарағай ауданындағы Канонерка орта мектебі – 10 млн теңге және Ақсуат ауданындағы Қ.Сәтбаев атындағы Жәнтікей орта мектебіне 10 млн теңге көлемінде қаржылай сыйақы табыс етілді. Сонымен қатар білім саласындағы жоғары жетістіктері үшін Оқу-ағарту министрлігінің Алғысхатына 22 мұғалім ие болды. Оқу-ағарту министрлігінің қосымша білім беру ісінің үздігі дипломын Жарма ауданы Өнер мектебінің жоғарғы біліктілік санаттағы хореография мұғалімі Данара Рахимбаева иеленсе, «Білім беру ісінің құрметті қызметкері» төсбелгісі Ақсуат ауданындағы С.Сейфуллин атындағы орта мектептің тарих пәні мұғалімі Эрнс Адилхановқа берілді. Бұған қоса Оқу-ағарту министрлігінің Құрмет грамотасымен 8 педагог, «Еңбек ардагері» медалімен 4 педагог, «Ы.Алтынсарин» төсбелгісімен 3 педагог марапатталды.
Абай облысы