Еліміздегі ерекше мереке

Сот жүйесі үшін Конс­ти­ту­ция күні ерекше маңыз­ды. Себе­бі судья­лар конс­титуциялық құн­ды­лық­тарды, азаматтардың құқық­­тары мен заңды мүдделерін қор­ғауды іске асырады. Қазіргі таңда Әділетті Қазақстан құ­ру үшін заң­ның үстемдігін, әділеттілік қағида­тын қамта­масыз ету басты міндет және солай болып қала береді.

Мемлекет басшысы Қасым-Жомарт Тоқаевтың бастамасымен сот жүйесін реформалау және цифрландыру бойынша бірқатар заңнамалық әрі практикалық шара қабыл­данып жатыр.

Жоғарғы сот басшылығымен әкімшілік әділет саласын, ювеналды соттардың соттылығын кеңей­ту, кассациялық саты­дағы сот­ты өз алдына дербес шы­ғару, аза­маттардың сот төре­лігі­не қол жеткізуін жеңілдету және судья­ларға жүктемені теңестіру үшін қалалардағы бірінші сатыдағы соттардың біріктіріп, болашақ судья­ларды даярлау бағыты бойын­ша да нақты қадамдар жасалып жатыр. Осы және басқа да жаңа­шыл­дық­тың барлығы сот жүйе­сінің басты міндетін шешу, яғни сот төрелігін жүзеге асырудың жоғары сапасын қамтамасыз ету болмақ.

Биыл қазан айында Мем­лекет басшысының қатысуымен Қазақстан судьяларының IX съе­зінің өтуі жоспарланып отыр. Аталған кездесуде кейін­гі төрт жылда атқарылған жұ­мыстың есебі тыңдалып, сот жүйесінің алдына қойылатын мақсаттар айқындалады.

Сот саласында қызмет жасап, Сот төрелігі академиясын тәмам­дап, Жоғарғы соттың және Жоғары сот кеңесінің жас мамандарды қол­дауымен, Президенттің сенім біл­діруімен алғаш рет Астана қала­сы бойынша ең жас судья болып тағайын­далдым. Сондықтан биылғы Конс­титуция күні мерекесінің менің өмірімде алатын орны ерекше.

Отандық сот жүйесінің алдында келелі мақсаттар тұр. Бұл – сотқа деген көпшіліктің сенімін арттыру. Осы орайда отандастарымызды айтулы мерекемен құттықтай отырып, заң үстемдігін жүзеге асырудағы қызметте табыс тілеймін.

Рахымжан ДҮЙСЕНБАЙ,

Астана қаласы мамандандырылған ауданаралық тергеу сотының судьясы