Маңғыстау облысында 50 тірек мектебін бекітіп, еліміздің жетекші мектептерімен ынтымақтаса отырып, кешенді әдістемелік қолдау тетіктері арқылы білім сапасын арттыру мақсатында тұңғыш рет «Отпан» жобасы іске асырылып жатыр.
Маңғыстау облысының әкімі Нұрдәулет Қилыбай «Отпан» жобасына енген шалғай ауылдарда орналасқан мектептердің жағдайымен танысты. Өңір басшысы алдымен Түпқараған ауданындағы Шахта мектебіне барды. Жобаға 700-ге жуық оқушы мен 80-нен астам мұғалім қатысып жатыр, шамамен 17-19 оқу сыныбы мен зертханасын жаңғырту жоспарланған. Сонымен қатар Нұрдәулет Қилыбай Маңғыстау ауданы Онды ауылындағы Әбіш Кекілбаев атындағы мектептің жаңа оқу жылына дайындығымен танысты. Мұнда «Отпан» жобасына 270-ке жуық оқушы мен 40-тан астам мұғалім қатысып, шамамен 16 оқу сыныбы мен зертханасын жаңғырту жоспарланған. Айта кету керек, жаңа оқу жылы қарсаңында бастау алған бірегей жобаға Бейнеу, Мұнайлы, Маңғыстау, Түпқараған, Қарақия аудандары, Жаңаөзен мен Ақтау қаласынан барлығы 50 мектеп қатысады. Аталған мектептерде материалдық базаны жаңарту, мұғалімдердің біліктілігін арттыру, сондай-ақ аудандар мен облыстың әдістемелік орталықтарын дамыту бағдарламасы іске қосылды.
Жоба шеңберінде осы 50 мектепте білім алатын 60 мыңнан астам оқушыларды қамту, 7 мыңға жуық мұғалім, мектеп әкімшілігі, психологтер, әдіскерлер, білім бөлімінің мамандарын оқыту қарастырылған.
Бастапқы кезеңде мектеп ғимараттарының жай-күйіне талдау жүргізіліп, нәтижесінде, сыныптардың материалдық және техникалық базасын жаңарту бойынша жұмыстар ұйымдастырылды. Екінші кезекте мұғалімдердің кәсіби қажеттіліктері анықталды, соған орай ұстаздардың біліктілігін арттыру Назарбев зияткерлік мектептері мен Білім-инновация лицейлері ұстаздары бастаған бір топ тренер мен сарапшы даярлаған арнайы оқу бағдарламасы арқылы жүзеге асады. Келесі бағыты – мектептерде құрылған педагогтер мен оқушыларды әрі қарай қолдау жұмыстары. Жобаны облыстық білім басқармасы мен білім саласын тұрақты дамыту қоры жүзеге асырып отыр.
– Облыстағы ұстаздардың біліктілігін арттыру бойынша жұмыс маусым айында басталды. Семинарлар мен тренингтер 13 пәннен, педагогика мен психология, бастауыш сынып секілді бағыттар бойынша жүргізіліп жатыр. «Отпан» жобасы аясында шығындардың басым бөлігі кәсіпкерлердің демеушілік көмегі арқылы өтелетінін атап айту керек. Әрбір қатысушы мектептің материалды-техникалық базасын жаңартуына және мұғалімдердің кәсіби біліктілігін арттыруға демеушілер тарапынан 170 млн тенге шамасында қаражат беріледі. Оған қоса мектептегі жөндеу жұмысына облыстық әкімдік тарапынан 1,5 млрд теңге бөлініп отыр, – деді Маңғыстау облысы білім басқармасының басшысы Динара Жұмашева.
Жобаны іске асыру мерзімі екі жыл, қосымша тағы бір жыл аясында педагогтерді қолдау жұмысы көзделген.
Маңғыстау облысы