Павлодар облысының спортшылары V Дүниежүзілік көшпелілер ойынында асық ату, ордо, овари, құраш және аба бойынша ел намысын қорғайды. Жалпы, өңірден 7 спортшы, бірнеше төреші қатысуға тиіс.
Ертіс – Баян өңірінің спортшылары Дүниежүзілік көшпелілер ойынына білек сыбанып дайын отыр. Спортшылар асық ату, ордо (асық атуға ұқсас ойын), құраш (қырғыз күресі), аба (түрік күрес түрі) және овари бойынша сынға түседі. Атап айтқанда, Серік Ақтаев пен Ернұр Мерешев овариден, Жомарт Нұрланов пен Керім Жаздықбай асық атудан, Саят Қизат ордодан, аба бойынша Мұхтар Дәлелханұлы, құраштан Алтынай Нұрханова жарыс жолына қосылады.
Тоғызқұмалақтан 3 дүркін Әлем чемпионы, Қазақстанның Еңбек сіңірген спорт шебері Серік Ақтаев отандық ойыншылардың овариден олжа салатын мүмкіндігі зор деп есептейді.
– Овариді 2008 жылдан бері ойнап келемін. Овари тоғызқұмалақ тектес ойындарға жатады. Ойын тақтасында 12 отау, 2 қазан, 48 тас болады. Негізгі мақсаты – 25 тас жинап, қарсыласты ұту. 24 тастан шықса, тең ойын болады. Қарсыласта жүріс таусылған кезде оны жүруге мәжбүрлеу тактикалары да қарастырылған. Бұл ойын Африка елдерінен шыққан. Биылғы жарысқа әлемнің үздік овари ойыншылары қатысады, – дейді спортшы.
С.Ақтаев кейінгі 16 жылда овариден әлемдік деңгейде өткен 24 халықаралық жарысқа қатысып, соның тең жартысында жеңімпаз атанған. Ал өзгесінде үздік үштіктен төмендеп көрмепті. Қазіргі мақсаты – 8-13 қыркүйек күндері Астана қаласында өтетін Дүниежүзілік көшпелілер ойындарында ұлттық құрама командасы қатарында барынша тәуір ойын өрнегін көрсету.
Ал Қайырбаев атындағы ұлттық клубтың директоры Дархан Жоламанов өңіріміздің спортшылары бабында екенін айтады.
Павлодар облысы