Жаңа оқу жылы басталысымен Маңғыстау облысының Мұнайлы ауданындағы бір мектепте келеңсіз оқиға болды. 6 қыркүйек күні кешке аталған аудандағы №8 мектептің 21 оқушысы ішінің ауруы, дене қызуы көтерілуіне байланысты жедел жәрдем шақырта бастаған. Бір тәулік ішінде, яғни 7 қыркүйек күні кешке дейін медициналық көмекке 67 бала жүгінген болса, оның ішінен 52 бала үй жағдайына бақылауда қалдырылып, 13 бала ауруханаға жатқызылған.
Оқиғаға байланысты Маңғыстау облыстық әкімдік жанынан жедел штаб құрылып, қарқынды жұмысқа кірісті. Денсаулық сақтау басқармасы тарапынан шақыртуларға дереу қызмет көрсетуге облыстық жедел және шұғыл медициналық көмек стансасының 12 негізгі және 4 қосымша бригадасы жұмыс істесе, Мұнайлы орталық аудандық ауруханасының шақыруларға қызмет көрсетудің 4 санатты 4 бригадасы және Ақтау қаласының 4 санатты 7 бригадасы жұмылдырылды. Сондай-ақ облыстағы емханалардың психологтер тобы ата-аналар мен балаларға қажетті көмек көрсетуге кірісті.
Ауруханаға арнайы барған өңір басшысы Нұрдәулет Қилыбай облыстық ауруханада жатқан оқушылардың жай-күйін көріп, ата-аналарына балаларының тезірек сауығып кетуін тіледі және сала, аурухана басшыларына уланған балаларға қажетті барлық көмекті көрсетуді, ауруханадағы жұмыс кестесін күшейтуді тапсырды. Жексенбі күні 300-ге жуық бала өз үйінде дәрігер қадағалауында қалдырылып, 67 бала ауруханаға жатқызылды, ал жағдайы ауырлау екі бала жансақтау бөліміне орналастырылды.
– Ауруханада тиісті ем-дом көрсетіліп жатыр. Дәрі-дәрмек пен төсектік орындар жеткілікті. Дәл қазір ең бастысы – оқушылардың денсаулығы. Науқастардың тез жазылып кетуіне барлық жағдайды жасауымыз қажет. Кейін осы жағдайға байланысты тиісті шаралар мен шешімдер қабылдаймыз, – деді Нұрдәулет Қилыбай.
Аталған оқиға бойынша Мұнайлы аудандық ПБ-нің СДТБТ-не ҚР ҚК-нің 304-бабы 1-бөлігімен №244750031000356 қылмыстық іс тіркеліп, сотқа дейінгі тергеп-тексеру жұмысы басталды. Сондай-ақ жағдайдың себебін анықтау мақсатында Маңғыстау облысының санитарлық-эпидемиологиялық бақылау департаменті де тексеріс жүргізуге кірісті.
Жексенбі күні кешке Маңғыстау облыстық денсаулық сақтау басқармасы басшысы Бекболат Ізбасаров денсаулығы жақсарған бірқатар баланың үйіне қайтарылып жатқанын хабарлады. Басқарма басшысының айтуынша, Мұнайлы ауданында мектеп асханасында тамақтан уланған балалардың жағдайы жақсарып келеді. Жалпы, ахуал тұрақтанған. Облыстық аурухананың жансақтау бөлімінде жатқан екі баланың беті бері қараған. Бүгін-ертең жалпы палатаға ауыстырылуы мүмкін.
– Дер кезінде басталған емнің септігімен балалардың өміріне қауіп жоқ. Барлық қажетті медициналық көмек көрсетіліп жатыр. Төсектік орын мен дәрі-дәрмек қоры толықтай жеткілікті, – деді Б.Ізбасаров.
Құзырлы орындардың қатысуымен оқиғаның себебі анықталып, нақты мәлімет хабарланады.
Маңғыстау облысы