Қарағандыдағы банк бөлімшелерінің бірінен адамдарды қауіпсіз жерге шығаруға чемодан себеп болған. Мән-жай анықталғанша банктің 200 клиенті мен қызметкері эвакуацияланған, деп хабарлайды Egemen.kz.
Оқиға бүгін, 10 қыркүйек күні сағат 16:00-де болған. «102» телефонына Қарағанды қаласы Бұқар жырау даңғылы бойындағы банктердің бірінің бөлімшесіне белгісіз біреудің чемоданды тастап кеткені туралы хабарлама келіп түскен.
«Қарағанды облысы ІІД жедел кезекшілері оқиға орнына шұғыл қызмет жіберді. Ғимараттан 200-ге жуық адам эвакуацияланды», деп хабарлады Қарағанды облыстық полиция департаментінің баспасөз қызметі.
Полиция қызметкерлері чемоданды зерттеп, ішінде жарылғыш зат емес, жеке заттар болғанын анықтаған.