Қысқа дайындықты жазда қолға алған Ақтау қаласында жылу құбырларын жөндеу жұмыстарының саябырсуы тұрғындардың алаңдауына түрткі болды. «Күн суытып келеді, жылу қосылу уақыты жақындады, көшедегі жұмыстар баяу жүріп жатыр», деп жұрт жергілікті әкімдікті мазалай бастады.
Ал жергілікті әкімдік межеленген мерзімге үлгеретінін айтады. Қазірде Ақтау қаласының магистралдық жылу желілерін жаңғырту жұмыстары қайтадан қарқын алды. Жылумен жабдықтау желісінің 11,4 шақырымы 11 учаскеге бөлініп, жұмыстар күшейтілген режімде жүргізіліп жатыр. Маңғыстау облыстық энергетика және тұрғын үй коммуналдық шаруашылық басқармасы басшысының орынбасары Абай Естекбаевтың айтуынша, жоспарланған 11 мың шақырымнан астам аумақтың 10 мың шақырымнан астам бөлігінде құрылыс-монтаждау жұмыстары аяқталған.
Бұл жөндеу жұмыстарының Ақтауды дамытуға тікелей қатысы бар. Өйткені 50 жыл, яғни жарты ғасыр бойы жөндеу көрмеген жылу құбырларының жаңартылып жатқаны – ерекше қуануға тұратын нәтиже.
«Жаңартуға қажетті құбырлар 100% сатып алынып, Ақтау қаласына жеткізілді, монтаждау 90%-ға орындалды. Аталған жұмыстарды қазан айына дейін аяқтау үшін күшейтілген режімде жұмыс істеп жатырмыз, алаңдауға негіз жоқ», дейді А.Естекбаев.
Демек мамандардың сөзіне сенсек, Ақтауда жылу беру маусымына қатысты күрделі, күлбілтелі мәселе жоқ. Жасалып жатқан баталы істердің бастысы – жарты ғасыр ауыспаған жылу құбырларының жаңартылуы. Оның игілігін қалың бұқара қазан айынан бастап көреді.
Маңғыстау облысы