Қос мұнаралы мешіт ашылды

Ғибадат үйінің құрылысы үш жыл бұрын басталған. Ертістің оң жағалауындағы Жібек маталар комбинаты шағын ауданында 146 мың халық тұрады. Күленов кентінде ғана 16 мың жан саны бар. Сондықтан есеп-қисапқа жүгіне отырып, кәсіпкерлер жаңа шағын ауданға бір мешіт керек деп шешкен.

– Өскеменде осыдан 12 жыл бұрын Халифа Алтай мешіті ашылған. Содан кейін ашылып тұрған мешіт – осы. Айта кетейін, бұл құлшылық орны ғана емес, сондай-ақ қазақтың салт-дәстүрін, әдет-ғұрпын үйрететіндей орталық ашылуы керек. Жастарды руханиятқа, түзу жолға баулып, жаман әдеттерден аулақ болуға шақыруымыз керек. Біздікі ұсыныс. Қалғанын мүфтият өздері нақтылайды, – деді құрылыс жұмыстарына демеу болған кәсіпкер Қайнар Дүйсенов.

Әрине, қазақтың ұмыт болып бара жат­қан салтын осындай рухани орындарда үйретіп, жастардың санасына сіңіру қажет-ақ. Жаңадан бой көтерген мешіттің ішкі-сыртқы сәулеті, дизайны да қазақы өрнектермен безендірілген. Еңселі ғимарат мың адамға шақталған. Мұнараларының биіктігі – 20 метр. Мешіттің негізгі залында тәлім-тәрбие, сабақ беру мақсатында 36 шаршы метрлік лэд-экран қойылған. Түсінгеніміздей, араб ті­лінде оқылып жатқан сүрелер қазақша ауда­рылып, экраннан шығып тұратын көрінеді.

Мешіттің тағы бір ерекшелігі, ерлер мен әйелдер екі бөлек есіктен кіріп, екі жақта намаз оқиды. Құран бағыштауға арналған бөлме де бар. Бала-шағасымен келген жамағаттың да жағдайы ойластырылып, шағын ғана ойнайтын бұрыш жасалған. Сондай-ақ 230 адамға арналған қатымхана ашылды. Ас пен науқаннан түсетін қаражат мешіттің коммуналдық қызметтерін төлеуге жұмсалады.

Облыстың бас имамы Ермек қажы Мұқа­тай­ұлының  айтуынша, 19-шағын аудан тұр­ғындары мешіттің қажеттілігін бұрыннан айтып жүріпті.

– Халықпен кездескен сайын мешіт болса деп тілек білдіретін. Ниеттеріне қарай кәсіпкер азаматтар қолға алып, тілек қабыл болды. Аз уақыттың ішінде зәулім мешіт бой көтерді, – деді Ермек қажы Мұқа­тайұлы.

Айтқандай, Әл-Фарабидің атауын беру туралы ұсыныс Діни басқармаға жіберілді.

ӨСКЕМЕН