Жекпе-жек десе, делебесі қозатын барша жанкүйер тағатсыздана күткен күнді де көруге жақын қалды. Тарихта тұңғыш рет қазақтың ұлы әлемдегі ең белді промоушен – UFC-дің чемпиондық белбеуіне таласады. Аталған ұйым Белал Мұхаммад пен Шавқат «Номад» Рахмонов арасындағы айқастың 7 желтоқсанда АҚШ-тың Лас-Вегас қаласында өтетінін ресми түрде жария етті.
Бүгінгі таңда UFC-дегі орта салмақтың алтын белбеуін Белал Мұхаммад иеленіп отыр. Биыл жазда ол Англияның Манчестер қаласында ұйымдастырылған жарыста жергілікті файтер Леон Эдварсты жеңген соң осы мәртебесі аса жоғары атаққа қол жеткізді. Енді арада бес айға жуық уақыт өткен соң Шавқат Рахмоновтың чемпионды тұғырдан тайдыруы әбден мүмкін. Қазіргі кезде көпшіліктің пікірі осыған саяды.
Аралас жекпе-жекті 2012 жылдан бері серік етіп келе жатқан 36 жастағы АҚШ-тың Чикаго қаласында туып-өскен палестиналық спортшы өз карьерасында 28 мәрте октагонға шығып, 24 рет жеңіске жетті. Үш кездесуде ұтылып, тағы бір бәсекенің нәтижесі есепке алынбады. Сол сайыстардың тек алтауын ғана Мұхаммад айқын басымдықпен аяқтады. Тарқатып айтсақ, бес қарсыласын нокаутқа жіберсе, тағы біреуін «қылқындыру» әдісімен ұтты. Қалған 18 жекпе-жектің шешімін төрешілер шығарды. Яғни Белалды «панчер» деп айту қиын. Сонымен қоса ол өзі де бір рет нокаутқа түсті. 2016 жылдың күзінде Нью-Йоркте ұйымдастырылған турнирде бразилиялық Висенте Лукенің оны бірінші раундта ұрып жыққаны есімізде. Ал Алан Джубан мен Нил Джеффтен Палестинаның өкілі ұпай санымен ұтылды. Дәл сол Джеффті біздің Рахмонов былтыр көктемде «қылғындырып» тастаған болатын.
Десек те алдағы жарыста Шавқатқа жеңіс оңайлықпен келеді деп айту қиын. UFC-де сегіз жыл жұдырықтасып, 18 жекпе-жек өткізген Белал Мұхаммад әбден ысылған сақа спортшы. Сол аралықта ол Лайман Гуд, Диего Лима, Демиан Майя, Стив Томпсон, Висенте Луке, Шон Брэди, Гилберт Бернс сынды марқасқаларды жеңді. Мұхаммад қарсы келгенін қоғадай жапырмаса да, оның батылдығы мен шыдамдылығы, төзімдігі мен табандылығына таңданбау мүмкін емес. Әр бәсекеде сауатты тактика ұстана біледі, көбіне-көп тәуекелге бармайды. Функционалдық даярлығы өте жақсы. Ол әрбір кездесуде қарсыластарын діңкелетіп барып ұтады. Соған да баса назар аударған жөн.
Ал Шавқаттың жөні бөлек. Таяу күндері 30 жасқа толғалы отырған қазақтың қайсар ұлы 18 жекпе-жектің барлығында айқын басымдық танытты. Сегіз қарсыласын «қылғындыру», «ауырту» тәсілдерімен ұтты. 10 бәсекелесін ауыр соққылардың астына алып, оларға «Қиыр Шығыстың қайда екенін» көрсетті. «Номад» тоғыз бәсекені бірінші, жеті кездесуді екінші раундтарда аяқтады. Тек тәжік Фаруддин Одилов (2018 жыл) пен америкалық Джефф Нил (2023 жыл) ғана үшінші раундқа дейін шыдады. Бірақ Рахмонов бірде-бір жекпе-жекті соңына дейін созған емес. Міне, осы жайттар Шавқаттың беделін шарықтатып тұр.
Сонымен, 7 желтоқсанда күллі әлем жанкүйерлерінің назары Лас-Вегасқа ауады. Әсіресе халқымызға бұл ерекше күн. Бұған дейін қазақтың өр мінезді өрендері талай белді промоушендердің алтын белбеулерін иеленгенін жұрт жақсы біледі. Ал аралас жекпе-жек әлеміндегі ең биік шың – UFC екені даусыз. Әзірге бұл белес бізге бағынған жоқ. Егер Шавқат Рахмонов алыстағы Америкада атой салып, чемпиондық тәжді иеленсе, онда Алаш жұртының талай жылғы арманы орындалып, қазақтың жігіттері өздерінің мықтылығын түбегейлі мойындатады.