«Қазаэронавигация» өкілдері Еуропа мен Азияның аэронавигациялық қызмет көрсетушілері (АНҚК) үшін аэронавигациялық қауіпсіздікті үйлестіру бойынша өңірлік платформаға (SOCEA) мүшелікке кіру туралы келісімге қол қойды.
Бұл ресми рәсім Ыстанбұлда өтті. Оған ұйымның барлық мүшесі: Тәжікстан, Өзбекстан, Қырғызстан, Түркия және Әзербайжан елдерінің өкілдері қатысты. Айта кетейік, бұл ұйым халықаралық аэронавигациялық ынтымақтастық платформасы ұшу қауіпсіздігін қамтамасыз етудің өңірлік стратегиясын әзірлеу, АНҚК арасындағы ынтымақтастықты дамыту, ӘҚҰ қауіпсіздігін бақылау жүйесін тиімді енгізуге жәрдемдесу, ұшу қауіпсіздігін басқаруда тәуекелге бағдарланған тәсілді қолдану, сонымен қатар әуе көлігінің тұрақты дамуын қолдау үшін халықаралық стандарттарды енгізу мен ӘҚҰ саласын цифрландыру және әуе кеңістігін тиімді пайдалану мақсатында құрылған.
«SOCEA»-ға мүше болу арқылы әуе қозғалысы көлемін ұлғайтуға, өңірдегі әуе қозғалысы қауіпсіздігін басқару жүйесін тиімді енгізуге және өңірлік деңгейде ұшу қауіпсіздігін басқаруға тәуекелдерді бағалау тәсілін қолдануға болады. Сондай-ақ осы саланы цифрландыру үдерісін жаңғырту мен стандарттауға жәрдемдесуге ықпал етеді.
«SOCEA мүшелігі өңірлік серіктестермен ынтымақтастық және әуе қозғалысын басқару саласында озық тәжірибе алмасу үшін стратегиялық мүмкіндік саналады. Біз өз тәжірибемізбен бөлісіп, барлық өңірдегі әуе кеңістігінің қауіпсіздігі саласында жаңа жетістіктерге жету үшін бірлесіп жұмыс істейміз», дейді «Қазаэронавигация» РМК бас директорының орынбасары Жеңіс Ауғалиев.
Аэронавигациялық қауіпсіздікті үйлестіру бойынша өңірлік платформа (SOCEA) былтыр 18 тамызда «Азербайджанские авиалинии» ЗАО (AZAL) мен Түркия мемлекеттік әуежайларының бас басқармасы (DHMI) арасындағы келісімнің нәтижесінде құрылды.