31 қазан мен 3 қараша аралығында Қытайдың астанасы Бейжіңде шайбалы хоккейден әйелдер арасындағы Азия чемпионатының жалауы желбірейді. Қытайда мына ойыншыларға сенім артылып отыр: Қақпашылар – Арина Щеколова («Томирис», Астана), Полина Говтва («Торпедо», Өскемен). Қорғаушылар – Юлия Буторина, Александра Воронова, Дария Молдабай («Томирис»), Катрин Мескини, Полина Яковлева («Торпедо») Аида Олжабаева, Анна Пяткова, Мәдина Тұрсынова («Айсулу», Алматы). Шабуылшылар – Мәлика Алдабергенова, Пернеш Әшімова, Алина Иванченко, Татьяна Королева, Лариса Свиридова («Айсұлу»), София Зубкова, Ділнәз Саяхатқызы, Мунира Саяхатқызы («Торпедо»), Екатерина Куценко, Анастасия Оразбаева, Надежда Филимонова, Александа Шегай («Томирис»).
2 қарашада Мәскеуде кәсіпқой бокстан Әлем құрамасы мен жергілікті «Динамо» клубы арасында матчтық кездесу өтеді. Сол турнирге қатысуға еліміздің өкілі Ибрагим Харсан (9-2-1, 6 КО) шақырту алды. 57 кг салмақта сайысқа түсіп жүрген 27 жастағы жерлесіміз Ресейдің астанасында биыл Еуропа чемпионы Эдуард Савинмен жұдырықтасады.
Шорт-тректен Қазақстан құрамасы Канадада өткен Әлемдік турдың бірінші кезеңіне қатысты. Отандастарымыздың арасында ең үздік нәтижеге Денис Никиша қол жеткізді. Ол «В» санатындағы сайыстың 500 метрлік қашықтығында финалға шықты. Алайда шешуші тұста «пенальти» алып, жарысты жалғастыру мүмкіндігінен айырылды. 5 000 метрлік эстафеталық жарыста біздің жігіттер алтыншы орынға тұрақтады.
Еліміздің танымал мәнерлеп сырғанаушысы Михаил Шайдоров 1–3 қараша аралығында Францияның Анже қаласында жалауы желбірейтін Гран-при турниріне қатысады. Мен өзенінің жағалауында 8 мемлекеттен келген 12 спортшы бақ сынайды.
Биылғы маусымда халықаралық аренада еліміздің конькишілері қандай құрамада өнер көрсететіні белгілі болды. Алдағы жарыстарда ел намысын Надежда Морозова, Кристина Шумекова, Кристина Силаева, Инесса Шумекова, Маргарита Галиева, Дарья Важенина, Мария Деген, Алтай Жәрдембекұлы, Виталий Щиголев, Нұралы Ақжол, Бақдәулет Сағатов, Роман Биназаров, Евгений Кошкин, Никита Важени, Андрей Семенов сынды спортшылар қорғайды. Конькишілер арасындағы алғашқы жауапты жарыс – «Төрт құрлық біріншілігі» 15–17 қарашада Жапонияның Хатинохе қаласында өтеді.
Парижде шымылдығы түрілген ATP Masters турнирін еліміздің бірінші ракеткасы Александр Бублик сәтті бастады. Тұсаукесер кездесуінде ол италиялық Фабио Фоньиниден 7:5, 7:5 есебімен басым түсті. Келесі кезеңде отандасымыз даниялық Хольгер Руне мен Апеннин түбегінің тағы бір теннисшісі Маттео Арнальди арасындағы бәсекенің жеңімпазымен шеберлік байқасады.