Мемлекет қолдауын пайдаланып, кәсібімді кеңейтсем дейтін іскер жандардың айы оңынан туып тұр. Нәтижесінде, өңірлерде жаңа өндіріс орындары ашылып, жергілікті тұрғындар «екі қолға – бір күрек» тауып жатыр. Павлодарда «Даму» қорының септесуімен көлік аккумуляторын өңдеу кәсіпорны мен тігін цехының жұмысы жанданды.
«Даму» қоры белгілі бір тауарларды шығаруда «кепілдік» және «субсидиялау» құралдарымен қолдау көрсетеді. Ішінара кепілдік шарттары негізінде кәсіпкерлер жобаның қажетті көлеміне дейін қаржы алады немесе қор кепілдіктері есебінен несие сомасын ұлғайтады. Мемлекеттің осындай қолдау шарапатын сезінген кәсіпорынның бірі – «Тандем-ПВ» ЖШС мен «Тандем recycling» ЖШС.
«Тандем-ПВ» – нарықта 2007 жылдан бері табысты жұмыс істеп тұрған кәсіпорынның бірі. Аккумулятор батареяларын сататын болашағы зор фирмалар санатында. Компания осы уақыт ішінде Павлодар, Екібастұз, Өскемен, Қарағанды, Семей, Алматы қалаларында дүкендердің ірі желісін ашты.
Кәсіпорын директорының орынбасары Геннадий Бобылевтың айтуынша, 2017 жылы жаңа жоба іске асырылып, пайдаланылған аккумуляторлық батареяларды бастапқы өңдеу цехы ашылды. Қазір цехтарда шамамен 12 білікті маман жұмыс істейді.
«Ал «Тандем recycling» ЖШС Павлодар облысында екінші қайтара өңделетін полипропиленнен кәріз құбырларын өндіруді көздейді. Қазір еліміздің алдында тұрған өзекті экологиялық проблемалардың бірі – «қоршаған ортаның қорғасынмен одан әрі ластануын болдырмау». Көп елдің тәжірибесі көрсеткендей, бұл мәселені шешу қоршаған ортаның экологиялық жағдайын жақсартуға, ең бастысы – халықтың денсаулығын сақтауға мүмкіндік береді. Мәселен, аккумуляторлық батареяларды қайта өңдеу желісі бүгінгі күнге дейін ең заманауи құрал-жабдықтармен қамтамасыз етілген. Яғни цех максималды қауіпсіздік пен жұмыс ыңғайлылығы үшін толығымен автоматтандырылған. Табысты жұмыс істеген алғашқы жылы кәсіпорын 1 000 тоннаға жуық аккумуляторды кәдеге жаратты. Бүгінде бұл сан жылына 3 000 тоннаға дейін өсті. 2019 жылы құю цехы іске қосылып, кәсіпорын қалдықтардан тазартылған қорғасын ала бастады. Ал аккумулятордың сыртқы қорабынан қалатын полипропилен бүгінге дейін ескерілмей келген. Енді оны да іске жаратудың жолын таптық», дейді директордың орынбасары.
«Тандем recycling» кәсіпорнының салынып жатқан жаңа цехы «Павлодар» арнайы экономикалық аймағында орналасқан. «Даму» көмегімен фирма 230 млн теңге несие алып, бүгінде полипропиленді қайталап өңдеу үдерісіне кірісіп жатыр.
«Елімізде жылына 30 мың тоннадай аккумулятор қалдық ретінде үйіліп қалады. Біз бұл бағытта ерінбей жұмыс жүргізіп, қазір елдегі аккумулятор өңдейтін екінші ірі зауыт атанып отырмыз. Бұрын тек Талдықорғанда жалғыз зауыт болатын. Кәсіпорнымыз нарықта танымал бола бастады. Қорғасынды балқытып, қайта құямыз. Оның технологиясын өзіміз жасадық. Ішіндегі сұйықтығын залалсыздандырып, кәріз жүйесіне ағызып жібереміз. Алдағы уақытта полипропиленнен жуандығы 110 мм-ге дейінгі құбырлар шығарамыз деп отырмыз. Өндірістік желіден сағатына шамамен 180 кило өнім шығады. Жетіспейтін шикізатты сырттан сатып аламыз деген жоспар бар. Дегенмен бізде жылына ескі аккумуляторлардан шамамен 700 тоннадай өнім жиналып қалады. Арнайы экономикалық аймақтағы жаңа цехымыз толықтай іске қосылғанда құйылып шыққан полипропилен құбырларды бірден сол жерден сататындай мүмкіндік жасалады. Цехқа қажет құрал-жабдықты Қытайдан жеткіздік. Келешекте жаңа өндірісте шамамен 70 адамдай адам еңбек етеді», дейді Геннадий Валерьевич.
Кәсіпкерлікті дамыту жөніндегі мемлекеттік бағдарламаның шапағатын көрген тағы бір отандық фирма – «L’Pakora» тігін фабрикасы. Кәсіпорын басшысы Лариса Рейдің сөзінше, қазір кәсіпкерлердің қарызы бойынша пайыздық мөлшерлемені субсидиялау, кредит бойынша ішінара кепілдік беру мен банктер арқылы жеңілдікті қаржыландыру сияқты қаржы құралдары елдегі кәсіпкерлік белсенділікті арттыра түсті. Аталған кәсіпорын спорттық форма, арнайы корпоративтік және біркелкі форма, сондай-ақ тоқылған киімдерді шығаруға бағытталған толық циклді іске қосты. Заманауи тігін машиналарымен жарақтанған цех отқа төзімді қысқы және жазғы комбинезондар, сигналдық және маусымдық жилеттер, адам денесін өндірістегі зиянды факторлардан жан-жақты қорғауға мүмкіндік беретін қорғаныш киімдерін, балабақшаға арналған төсек жиынтықтарын тігеді.
«Жалпы ауданы шамамен 400 шаршы метр цехты жалға алдық. Фабрикада 17 тігінші жұмыс істейді. Қала колледждерінің студенттері де тағылымдамадан өтеді. Мемлекеттік бағдарламалар көмегімен өз ғимаратымызға көшсек деген жоспарымыз бар. Фабрика үшін тігін жабдықтарын сатып алу жөніндегі жобаны «ForteBank» АҚ «Бірыңғай кешенді бағдарлама» мемлекеттік бағдарламасы шеңберінде жылдық 19,5%-бен қолдады. Мұнда қарыз алушының түпкілікті мөлшерлемесі – 8%-дан 10%-ға дейін. Ал айырмашылықты мемлекет өтейді», деді кәсіпорын директоры.
Атап өтерлігі, «Даму» қоры Павлодар облысының шағын және орта кәсіпорындарына жыл басынан бері жалпы сомасы 60,7 млрд теңгеге қолдау көрсеткен. Барлығы 791 жоба қолдау тапты. Оның ішінде субсидиялау бағытында – 46,6 млрд теңгеге 466 жоба, кепілдік беру бағытында – 14,1 млрд теңгеге 325 жоба, жеңілдетілген несиелеу бағытында 4 млрд теңге сомасына 41 жоба қаржыландырылды.
«Субсидиялау нәтижесінде кәсіпкерлердің несие бойынша пайыздық мөлшерлемесі төмендейді және ай сайынғы төлемдері азаяды. Павлодар облысында 2010-2023 жылдар аралығында мемлекеттік қолдау алған кәсіпкерлер 16 мың жаңа жұмыс орнын ашып, бюджетке 454 млрд теңге салық төледі», дейді «Даму» қорының Павлодар облыстық филиалының директоры Игорь Одинокий.
Павлодар облысы