Елімізде алғаш рет мектеп оқушылары арасында «Егемендігім – елдігім» атты республикалық «Қола домбыра» оқушылар айтысы өтті. Астана төріндегі Л.Н.Гумилев атындағы Еуразия ұлттық университетінің сахнасында өткен дүбірлі доданы Оқу-ағарту министрлігі Айтыс ақындары мен жыршы-термешілердің халықаралық одағымен бірлесіп «Біртұтас тәрбие бағдарламасы» аясында ұйымдастырған.
Алғаш рет өткен дүбірлі додаға республикамыздың әр өңірінен 22 ақын қатысып, айтыстың алғашқы күні 11 жұп болып бақ сынасты. Ұлтымыздың бірегей өнерін қолдау мақсатында Оқу-ағарту министрі Ғани Бейсембаев, Парламент Мәжілісінің депутаттары Аманжол Әлтай, Жанарбек Әшімжан, Л.Н.Гумилев атындағы ЕҰУ ректоры Ерлан Сыдықов арнайы келіп, жас өрендердің өнеріне сәттілік тіледі.
«Айтысқа жас ақындарды бала кезінен баулу мақсатында Жүрсін Ерман басқаратын Айтыс ақындары мен жыршы-термешілердің халықаралық одағы биылға арналған бағдарламасын бекіткен еді. Сол бағдарламада ұрпақ сабақтастығын ескере отырып, үш сатылы айтысты өткізуді қолға алғанбыз. Әуелгі бірінші саты – «Қола домбыра». Бұған Серікзат Дүйсенғазы жетекшілік етеді. Екінші саты – Еркебұлан Қайназаров жетекшілік ететін «Күміс домбыра» жобасы. Үшінші сатысы – қазіргі майталман ақындарымыз бақ сынайтын, жылда желтоқсан айында елорданың төрінде байрағын көтеретін «Алтын домбыра» айтысы», деді салтанатты доданың шымылдығын ашқан Парламент Мәжілісінің депутаты Аманжол Әлтай.
Сөз сайысында айтыскер оқушылар жастарына сай әдемі әзілдесіп, қоғамдық мәселелерді де көтеріп, тақырыпты да тапқыр жырлай білді. Осылайша, қазылар алқасының шешімімен іріктелген 8 ақын келесі кезеңге өтті. Олардың арасынан соңғы сынға 5-сынып оқушысы, шымкенттік Ислам Әли Біржанұлы мен 11-сынып оқушысы, маңғыстаулық Бейбіт Байжігіт суырылып шығып, сөз сайысын жандандыра түсті.
Айтыстың қорытындысында Шымкент қаласынан келген Ислам Әли Біржанұлы топтан озып, тұңғыш «Қола домбыра» иегері атанды. Жүлделі бірінші орынды маңғыстаулық Бейбіт Байжігіт, екінші орынды ақтөбелік Арай Нұрадин мен астаналық Айғаным Мақсұтханова иеленді. Ал үздік үштікті Алматыдан келген Ерасыл Сейітжанұлы мен Рауан Нұршабеков, қостанайлық Нұрислам Рогатов түйіндеді. Суырыпсалма сөз сайысына қатысқан өзге ақындарға Қаныша Райысова, Есенқұл Жақыпбек, Нартай Бекежанов атындағы арнайы жүлде мен бағалы сыйлықтар берілді. Сонымен қатар ақындардың тәлімгер-ұстаздарына Оқу-ағарту министрінің Алғысхаты табысталды.
Тағы бір қуанарлық жайт, жас айтыскерлерді марапаттау салтанатында сөз алған Оқу-ағарту министрі Ғани Бейсембаев мектеп оқушылары арасында өтетін бұл айтыстың ауқымын алдағы жылы кеңейте түсетінін айтса, Л.Н.Гумилев атындағы ЕҰУ ректоры Ерлан Сыдықов республикалық «Қола домбыра» оқушылар айтысының жыл сайынғы жеңімпазына ЕҰУ білім грантын тағайындайтынын жеткізді.