Назарбаев университетінің екінші курс магистранты Айдарбек Нуфтолла Гононулуда өтетін «PRiME-2024» халықаралық конференциясына қатысу үшін Америка электрхимиялық қоғамының (ECS) грантына ие болды.
Төрт жыл сайын өтетін бұл конференция электрхимия саласындағы ғалымдар арасында айтулы оқиға саналады. Мұнда әлемнің жетекші ғалымдары озық идеялармен бөлісіп, соны ғылыми жетістіктерді талқылайды. Мысалы, атақты америкалық өнертапқыш Томас Эдисон ұзақ жыл бойы осы қоғамның мүшесі болған. Қазір оған көптеген Нобель сыйлығының лауреаты ғана емес, сонымен бірге литий-иондық батарея жасаушылары да мүше болып кірген.
Жас ғалым «PRiME-2024 конференциясында ZIF-8 кеуекті материалымен қапталған мырыш оксиді (ZnO) сияқты өзгертілген наноматериалға негізделген газ сенсорларын әзірлеуге арналған жұмысын таныстырады.
«Бұл сенсорлар белгілі бір газдарға жоғары сезімталдық пен селективтілікке ие. Сондықтан олардың экологиялық және өндірістік мәселелерді шешуге маңызы зор. Әсіресе осындай беделді жиынға зерттеуімді ұсынуға қолдау көрсеткен ғылыми жетекшім, профессор Алмагүл Ментбаева мен доктор Бақтияр Солтабаевқа алғысымды айтамын», деді ол.
Ізденімпаз магистранттың аталған жұмысы NU Озық сенсорлар зертханасында (ASL) жүргізіліп жатқан ғылыми зерттеулермен тығыз байланысты. Бұл зертхананың мақсаты – өндірістік нысандардағы қауіпті газдарды жылдам анықтау үшін қолданылатын жаңа сенсорлық технологияларды дайындап, енгізу.
«Ауыл шаруашылығында мұндай сенсорларды көкөністер мен жеміс-жидектерді жинап алғаннан кейінгі күйін бақылауға пайдалануға болады. Өйткені бұл сенсорлар өнімдер бұзылғанда бөлінетін этилен секілді газдарды анықтайды. Бұл шығынды азайтып, өнімнің сапасын жақсартуға көмектеседі», дейді зерттеуші.
Айдарбек өз сөзінде еліміздің экологиялық жағдайын жақсартып, экономиканы дамытуға ықпал ететін тиімді әрі қолжетімді технологияларды әзірлеп, газ сенсоры саласындағы зерттеулерін жалғастыра беретінін жеткізді.