Маңғыстау облысындағы Бейнеу ауданының орталығы Бейнеу ауылы еліміздегі ең үлкен ауыл болып саналады. 57 мың тұрғыны бар ауылдың жалпы аумағы 51 мың га. Маңғыстау облысының әкімі Нұрдәулет Қилыбайдың ауданға іссапары барысында өңір өміріне қатысты жаңалықтар жария етілді.
Бейнеуде тұңғыш рет заман талабына сай аудандық кітапхана мен жаңа кинотеатр ашылады. Қазір соңғы дайындық жұмыстары жүріп жатқан кинотеатр жақын күндері салтанатты жағдайда тұрғындар игілігіне ұсынылады. Аумағы 400 шаршы метр болатын кинотеатр ғимараты 180 орынға арналған. Мәдениет ошағына мансап орталығы арқылы жұмыссыздық кезегінде тұрған 10 адам жұмысқа алынады.
Тағы бір жарқын жаңалық – аудандағы алғашқы заманауи кітапхананың құрылысы. Бұл жоба Мемлекет басшысы Қасым-Жомарт Тоқаевтың жастардың кітапқа деген қызығушылығын арттыру жөніндегі тапсырмасы аясында жүзеге асып жатыр. Көлемі 825 шаршы метр болатын екі қабатты ғимарат бір мезетте 62 адамды қабылдай алады. Ғимаратта оқушы балаларға, ересектерге, мүмкіндігі шектеулі адамдарға арналған 5 оқу залы, кітап сақтау қоймасы мен интернет желісімен жабдықталған арнайы кабинеттер бар. Жаңа кітапхана ғимараты іске қосылатын уақыт та алыс емес, 2025 жылдың бірінші жартыжылдығына белгіленген.
Бұл игі шара 218 123 дана кітап қорын қамтитын, 62 қызметкер жұмыс істейтін Бейнеудің қазіргі кітапханасына зор қолдау. Биылғы жылдың он айында кітапханаға 89 мың адам келіп, олардың 26 765-і тұрақты оқырман ретінде тіркелген.
Үлкен ауылдағы 154 көшенің 66-сына асфальт төселген. Қазіргі таңда тұрғындарға қолайлы жағдай жасау мақсатында 127 көше жарықтандырылып, тозығы жеткен 553 дана электр бағанасы ауыстырылып жатыр. 108 млн теңгені құрайтын жоба аясында ауыл көшелеріне 589 дана жарық шам орнатылды. Алдағы уақытта Бейнеу ауданына қарасты басқа да елді мекендердегі көше шамдарын кезең-кезеңімен жаңалау жоспарланып отыр.
Биыл ауылда 18 жаңа қоғамдық көлік пайдалануға берілді. Жолаушылар автобустары қозғалыс кезінде тұрғындардың қауіпсіздігі мен жайлылығын толық қамтамасыз ететін заманауи құрал-жабдықтармен жабдықталған әрі халықаралық экологиялық стандарттарға сай жасалған, қоршаған ортаға зиянын тигізбейді, электронды жол ақысын төлеу жүйесі де бар.
Бейнеуде әлеуметтік аз қамтылған отбасыларға арналған жаңа үйлер салынып жатыр. Республикалық бюджеттен бөлінген 284 млн теңгеге жыл соңына дейін 20 үйдің құрылысы аяқталып, тұрғын үй алу кезегінде тұрған халықтың әлеуметтік жағынан осал топтарына жататын азаматтарға беріледі. Ел аузында «берекелі Бейнеу» атанған өңірде қолға алынған игілікті жұмыс жүйелі жалғаса береді.
Маңғыстау облысы