Адал еңбек етіп, маңдай термен тапқан малдан асқан қайыр мен береке жоқ. Он екі мүшесі сау бола тұра, өзгеден бір нәрсе дәметіп сұрауды әдетке айналдыру не пайданы көздеп, тіленші болу адамды кедейліктен құтқармайды, керісінше, масылдық өмір салтына ұрындырады. Демек тұрмысы төмен, бірақ аяқ-қолы бүтін адамдарға тегін дүние бергеннен гөрі, оның еңбек етуіне жағдай жасау, қолғабыс қылу, балық орнына қармақ беру – ең дұрыс шешім.
Осы орайда Қазақстан мұсылмандары діни басқармасы жанынан құрылған «Зекет және қайырымдылық» қоры тарапынан қолға алынып жатқан ауқымды жобалар жөнінде әңгімелеудің реті келіп тұр. Соның бірі – «Zeket hub» қайырымдылық орталығы. Бұл орталық мұқтаж отбасылардың аяққа тұруына жағдай жасау, сондай-ақ оларды кәсіпке баулу бағытында жұмыс жүргізіп келеді.
Астана, Алматы қалалары мен Қызылорда, Алматы және Ақмола облыстарында қызмет ететін орталықта тұрмыс жағдайы төмен отбасылардан шыққан жандарға нарықтағы сұранысқа ие мамандықтар бойынша қысқамерзімді оқыту курстары ұйымдастырылған. Атап айтқанда, кәсіп мектебі (дәнекерлеуші, жиhаз құрастырушы, СММ, мобилография, кілт жасау, емдік денешынықтыру жаттықтырушысы, т.б.), бизнес мектебі (жобалау менеджері, өнім менеджері), этнокәсіп (астау жасау, ұлттық киім тігу, көрпе тігу), ағылшын тілі курстары бар. Сондай-ақ «Zeket hub» орталығында тігін шеберханасы, жиһаз шығару, металл дәнекерлеу, кілт жасау оқу-жаттығу цехтары жұмыс істейді.
Жаңа мамандықтарды игеріп, өмірден өз орнын табуға ниетті мұқтаж жандар бұл қысқамерзімді оқыту курстарын тәмамдаған соң, оларға сертификат табысталып, жұмыс орындарына бағыт-бағдар беріледі. Қор мамандарының айтуынша, нарықта сұранысқа ие мамандықтарды меңгеру арқылы тіршілігін дөңгелетіп, басқа мұқтаждарға да көмек бере алатындай дәрежеге жетіп, қоғамға пайдалы әрі сауапты істерімен еңбекқорлықтың үлгісін көрсететін дәулетті мұсылмандар қатарын толтырудың маңызы зор. Осы орайда теңізге тамған тамшыдай болса да, өз орнын таба алмай жүрген немесе мамандықты оқып үйренуге мүмкіншілігі шектеулі мұқтаж жандардың аяққа тұрып кетуіне атсалысып, қоғамның белгілі бір саласының маманын қалыптастыру – қордың алға қойған негізгі мақсаттарының бірі.
Еңбекке толық қабілетті жандармен қатар, мүмкіндігі шектеулі азаматтардың да өзгелермен тең дәрежеде еркін өмір сүруі үшін қабілетіне қарай кәсіпке баулу да назардан тыс қалған емес. Осы ретте «Zeket hub» қайырымдылық орталығында есту және сөйлеу қабілеті нашар жандарға арналған «Ерекше кәсіп» жобасы бойынша кілт жасау курстары өткізіледі. Алдағы уақытта мылқау жандарға кілт жасау бойынша сабақтар жүйелі түрде жүргізілмек. Сонымен қатар осы жылы Алматы облысында зағип жандарға арналған оқу орталығын ашу жоспарланып отыр.
Қазіргі жаhандану заманында халықаралық деңгейде ағылшын тілін меңгерген мамандарға сұраныс өте жоғары. Осыған орай «Зекет және қайырымдылық» қоры тарапынан тіл үйренуге ынтасы бар, бірақ жағдайы төмен балаларға арнап ағылшын тілі курстары ұйымдастырылған. Қазіргі уақытта еліміздің шалғай елді мекендерінде тұратын тұрмысы төмен отбасылардан шыққан 10-нан аса балаға ағылшын тілі пәнінен онлайн сабақ жүргізіліп жатыр.
Жоғарыда айтқандай, қор тарапынан қолға алынған тағы бір жемісті жетістік – «Өмірге үміт сыйла» жобасы аясында емдік денешынықтыру нұсқаушыларын даярлау курсын құру мақсатында арнайы бастама қолға алынған. Нәтижесінде, өңірлердегі 10-ға жуық нұсқаушы аталған курста оқып, біліктілігін арттырды.
«Зекет және қайырымдылық» қоры халық игілігі үшін ұзақ мерзімге пайдасын беретін жобаларды да қосымша қолға алды. Соның бірі – қоғамдағы әлеуметтік аз қамтылған мұқтаж отбасыларды немесе әлсіз топтарды қамқорлыққа алу мақсатында «Qaz-qatar» құрастырылмалы тауық фермалары жобасын іске қосты. Жалпы, құс фермаларын дамыту – халықты ет және жұмыртқамен қамтамасыз ету арқылы әлеуметтік жағдайды жақсартуға мүмкіндік береді. Сондай-ақ фермалар санын көбейту арқылы жұмыссыз жүрген азаматтарды кәсіпке баулып, жұмыспен қамту ауқымының кеңейетініне үміт бар. Қазіргі уақытта Түркістан облысында құрастырылмалы тауық фермалары жұмыс жүргізіп келеді. Онда 4 мың шамасында тауық бар.
Бүгінгі заман талабы – білім алу мен кəсіп қылу. Өкінішке қарай, қоғамда аяққа тұрып кету үшін бастапқы кәсіптік білімді алуға жағдайы жетпейтін мұқтаждар да баршылық. «Көп түкірсе – көл» демекші, мүмкіндігі бар адамдар соларға қолұшын созып, демеп жіберсе – сауапты іс. Қордың алға қойып отырған мақсаты да – осы. Жоғарыда аталған жобалар – әлеуметтік аз қамтылған топтардың күн көрісін мейлінше жақсартып, жарқын болашаққа сенімін арттыратын, тіршілік көзін таба алмай, еңсесі түскен жандардың қоғамның толыққанды мүшесі ретінде қалыптасуына ықпал ететін мүмкіндік боларына сенім мол.
Айта кетсек, осындай игі мақсатты басшылыққа алған «Зекет және қайырымдылық» қоры 2012 жылы құрылған. Оның осы жылдары жүзеге асырған ең ірі жобасы деп «Ел үлесі – пәтерге» қайырымдылық акциясын айтуға болады. Тұрақты түрде өтіп келе жатқан бұл акция аясында осы күнге дейін 788 мұқтаж отбасыға пәтер кілті табысталды. Ал «Тайқазан», «Қолдан-қолға», «Киім-кешекпен көмек», т.б. жобалары аясында барлық өңірде аз қамтылған отбасыларға қаржылай көмек, азық-түлік және киім-кешек үлестіріліп келеді.