Мәжілістің Аграрлық мәселелер комитетінің төрағасы Серік Егізбаевтың жетекшілігімен биылғы егінді сақтау және өткізу мәселелері туралы кеңейтілген отырыс өтті. Жиынға Мәжіліс төрағасының орынбасары Альберт Рау, Премьер-министрдің орынбасары Серік Жұманғарин және жауапты мемлекеттік органдардың өкілдері қатысты.
Отырысты ашқан Серік Егізбаев өткен аптада ауыл шаруашылығы қызметкерлерінің бірінші форумында Президент Қасым-Жомарт Тоқаев қазіргі жаһандық және ішкі сын-қатерлер тұрғысынан саланы дамыту және оның бәсекеге қабілеттілігін арттыру бойынша ауқымды міндеттер қойғанын еске салды. Сондай-ақ депутат агроөнеркәсіп кешенінің мәселелері фермерлермен тұрақты түрде комитет отырысында талқыланып, 13 қарашада өткен жалпы отырыста Үкіметке тиісті депутаттық сауал жолданғанын айтты. Онда шұғыл шешімді қажет ететін бірқатар мәселе қамтылған.
Ауыл шаруашылығы министрі Айдарбек Сапаров өз сөзін тақырып аясындағы сауалдарға жауап беруден бастады. Ол өткен жұмадағы ауыл шаруашылығы қызметкерлері форумында Мемлекет басшысы «Азық-түлік келісімшарт корпорациясы» арқылы нарықтағы бағаны тұрақтандыру үшін фермерлерден астық сатып алуды ұйымдастыруды тапсырғанын айтты.
– Осы тапсырманы орындау мақсатымен бүгін Азық-түлік корпорациясы сатып алу бағасын жариялайды. Үкімет резервінен 10 млрд теңге бөлініп, алғашқы 155 мың тонна астықты сатып алу жоспарланып отыр. Сонымен қатар корпорация астық бағасының күрт төмендеуіне жол бермеу үшін фермерлерді ірі келісімшарттар жасауға жұмылдырып жатыр. Қазіргі таңда консолидация нәтижесінде 20 млн долларға бес экспорттық келісімшарт жасалды, – деді министр.
Көктемгі егіс және егін жинау жұмыстарына берілген несиенің мерзімін ұзарту мәселесіне қатысты министр бүгінгі таңда шаруалардан 5,1 млрд теңгеден аса несиеге 119 өтініш келіп түскенін айтты. Бұл ретте әр жағдай жеке-жеке қаралады, жаппай ұзарту қарастырылмаған.
Сонымен қатар А.Сапаров субсидиялар бойынша қарыздарды өтеу белгіленген кестеге сәйкес жүргізілетінін атап өтті. Әкімдіктердің дерегіне сүйенсек, қосымша субсидия қажеттілігі 256 млрд теңгені құрайды. Алайда «күту тізімінде» жалпы сомасы 194 млрд теңге болатын мақұлданған өтінім тұр. Оның ішінде 56 млрд теңгесі – өсімдік шаруашылығына, 20 млрд теңгесі – мал шаруашылығына, 118 млрд теңгесі қаржы құралдарына бағытталған.
– Субсидия – өте маңызды әрі ауқымды мәселе. Субсидиялар заманауи технологияларды, тыңайтқыштарды, гербицидтерді қолданатын, техника сатып алатын алдыңғы қатарлы шаруашылықтарға берілуі керек. Бірақ жылдар бойы мұндай шаруашылықтар субсидия ала алмаса, тауы шағылады. Сондықтан осы мәселені шешіп, субсидия бойынша қарызды толық өтеу маңызды деп есептеймін, – деді Мәжіліс депутаты Еркебұлан Мәмбетов.
Депутаттар өз тарапынан басқа да ұсыныстар айтып, жауапты мемлекеттік органдарға нақты сұрақтар қойды. Атап айтқанда, астықты сақтауды цифрландыру, тасымалдау шығындарын субсидиялау, аймақтық логистикалық хабтар құру, қант қызылшасын өткізу, күнбағысты экспорттау және басқа да мәселелер көтерілді.
Жиын соңында Серік Егізбаев кеңейтілген отырыста фермерлерден келіп түскен мәселелер бойынша ұсынымдар Үкіметке жеткізілетінін атап өтті.
– Үкімет отырысының қорытындысын күтеміз. Бүгінгі талқылаудың негізгі тақырыбы астық болғанымен, депутаттар көтерген барлық мәселе – қант қызылшасы, күнбағыс, күрішке қатысты сұрақтар Үкіметтің шешімінде ескерілсе екен дейміз, – деп түйіндеді комитет төрағасы.