Өңір әкімі Нұрдәулет Қилыбайдың өкімімен облыстық туризм басқармасының басшысы қызметіне Ерсін Ибрашев тағайындалды, деп хабарлайды Egemen.kz.
Облыс әкімдігінің баспасөз қызметі мәлім еткендей, жаңа басқарма басшысын ұжымға облыс әкімінің орынбасары Аббат Өрісбаев таныстырды.
Ерсін Ибрашев 1989 жылы туған. 2013 жылы Қытай мұнай университетін мұнай-газ ісі мамандығы бойынша және 2019 жылы М.Әуезов атындағы Оңтүстік Қазақстан мемлекеттік университетін халықаралық қатынастар мамандығы бойынша аяқтаған.
Еңбек жолын 2014 жылы инженер-технолог болып бастап, 2015-2016 жылдары жеке компанияларда басшылық лауазымын атқарған.
2017 жылы «Мұнай және газ ақпараттық-талдау орталығы» АҚ Талдау және жобаларды басқару департаментінің менеджері болды.
2018 жылы Ұлттық экономика министрлігі Салық және кеден саясаты департаменті Жер қойнауын пайдалану келісімшарттарын сараптау басқармасының бас сарапшысы қызметін атқарған.
2019 жылы Ұлттық экономика министрлігі Жобалауды басқару департаменті Жобалауды басқару жөнінде мемлекеттік органдарды үйлестіру басқармасының бас сарапшысы, ал, 2020 жылы басшысы лауазымын атқарды. 2021 жылы аталған департаменттің Мемлекеттік органдарды жобалық басқару бойынша үйлестіру және қолдап отыру басқармасының басшысы болды.
2023 жылдан осы уақытқа дейін Қазақстан Республикасы Ұлттық экономика министрлігі Ішкі әкімшілендіру департаменті директорының орынбасары қызметін атқарды.