Маңғыстау облысындағы ауызсу тапшылығы өңірде қосымша су көздерін ашу, яғни ащы суды тұщытып пайдалану қажеттігін танытты. Осы орайда су тұщытатын зауыттарды салу жобалары қолға алынды. Маңызды жобалардың үшеуі Түпқараған ауданы аумағында жүзеге асып жатыр.
Тұрғындар санының артуына байланысты ауданда маңызды әлеуметтік нысандар құрылысы да қолға алынған, солардың бірі – аудан орталығы Форт-Шевченко қаласында, Баутин, Аташ елді мекендерінде салынып жатқан су тұщытатын зауыттар құрылысы. Аталған ауылдарда сумен қамтамасыз ету мақсатында тәулігіне 5000 текше метр теңіз суын тұшытатын зауыт салынып жатыр. Қазіргі уақытта зауыттың құрылысы 80%-ға аяқталған. Бүгінде бұл елді мекендерге ащы су құбырлары арқылы, ал тұщы су жерасты көздерінен арнайы тасымалдаушылармен жеткізіледі. Жыл соңына дейін зауыт толық іске қосылып, құбырлар арқылы тұщытылған су тұрғындарға берілмек.
Ауданның инфрақұрылымын жақсарту бағытындағы тағы бір маңызды жоба – тәулігіне 1000 текше метр кәріз суын тазартуға арналған жаңа тазарту жүйесінің құрылысы. Бұл жобаның 95%-ы аяқталып, жақын арада іске қосылады деп жоспарланған.
Ауданда әлеуметтік нысандар да көптеп бой көтеріп жатыр. Биыл Форт-Шевченко қаласында 100 орындық жатақхана мен 260 орындық өнер мектебі салынып жатқаны көңіл қуантады. Қазіргі таңда құрылысы 95%-ға аяқталған жатақхана жыл соңына дейін пайдалануға беріледі. Бұл нысан аудандағы тапшы мамандарды қызметтік пәтерлермен қамтамасыз ету үшін қарастырылған. Сондай-ақ жалпы аумағы 1,6 гектарды құрайтын өнер мектебінің құрылысы 85%-ға дайын. Жыл соңына дейін ашылуы жоспарланған мектепте балалар мен ересектерге арналған мәдениет, өнер секциялары жұмыс істейтін болады.
Үш ауысымды оқытуды жою, оқу орындарының тапшылығын азайту мақсатында Сайын Шапағатов ауылдық округінде 1200 орындық, үш қабатты заманауи мектеп құрылысы қарқынды жүріп жатыр. Жоспарға сәйкес, білім ордасы 2025 жылы пайдалануға беріледі.
Маңғыстау облысы,
Түпқараған ауданы