«ҚМГ» мен «Татнефть» «Қаратон Подсолевой» учаскесінде тереңдігі 5500 метр алғашқы іздеу ұңғымасын бұрғылауға кірісті. Атырау облысында бұрғылау жұмыстарын бастау рәсіміне «ҚазМұнайГаз» ҰК» АҚ (ҚМГ) басқарма төрағасы Асхат Хасенов және «Татнефть» ЖАҚ бас директоры Наиль Маганов, сондай-ақ ҚМГ басқарма төрағасының бірінші орынбасары Құрманғазы Есқазиев қатысты.
– «Қаратон Подсолевой» учаскесінде алғашқы іздеу ұңғымасын бұрғылауды бастау – Қазақстанның ресурстық базасын нығайтуға жасалған маңызды қадам. Бұл жоба біздің қор көлемін ұлғайту және жер қойнауының күрделі учаскелерін игеруге бағытталған стратегиялық міндеттерімізге сай келеді. «Татнефть» компаниясымен бірлескен күш-жігеріміз нәтижелі болып, еліміздің мұнай-газ саласындағы әлеуетін арттыруға үлес қосатынына сенімдіміз, – деп атап өтті А.Хасенов.
– Біз Қазақстандағы әріптестермен түрлі бағытта өзара байланыс орнаттық. Бүгінгі іс-шара – сол серіктестігіміздің табысты жалғасының жарқын көрінісі. «Қаратон Подсолевой» учаскесінің әлеуеті зор, бұл Қазақстан Үкіметінің қолдауының арқасында жаңа табысты ортақ жобалардың негізіне айнала алады, – деп атап өтті «Татнефть» ЖАҚ бас директоры Наиль Маганов.
«Қаратон Подсолевой» жобасы еліміздегі күрделі кен орындарының инвестициялық тартымдылығын едәуір арттырған. Жақсартылған модельдік келісімшарт шеңберінде іске асырылуда. Бұл механизм жер қойнауының күрделі учаскелерін барлау және игеру үшін жағдай жасай отырып, маңызды реттеуші және фискалды преференцияларды ұсынады.
Жер қойнауында терең орналасқан көмірсутектерді іздеу техникалық тұрғыдан үлкен қиындықтармен қатар жүреді, оған берілген тереңдік, ықтимал жоғары қабат қысымы, күкіртті сутектің болуы және қалың тұз шөгінділерін жатқызуға болады.
«Қаратон Подсолевой» учаскесі Теңіз ірі кен орны мен «Ембімұнайгаз» компаниясының кен орындарына жақын орналасқан.