Семейде «Бірге! Бір толқында» дәстүрлі жастар форумы өтті. Бұл форум аймақтағы жастар ұйымдарының көшбасшылары мен еріктілерін, белсенділер мен өңірдегі студенттер клубтарының мүшелерінің басын біріктірді. Іс-шараға қатысқан облыс әкімі Нұрлан Ұранхаев жастар болашақтың қозғаушы күші екенін және оларға құрмет көрсету, шабыттандыру қажет екенін айтты.
Жастар ел болашағы болғандықтан олардың осы бастан қоғамның қозғаушы күші ретінде бірегей бастамалардың басы-қасынан табылуы көңіл қуантады. Бүгінде облыс жастары жаңа идеяларды алға тартып, жүзеге асыруға батылдық танытып келеді. Өңірдің қоғамдық өміріне өң беріп, білім мен ғылым, өнер мен спорт, волонтерлік қызмет пен кәсіпкерлік салаларда еңбек етіп, жетістікке жеткен замандастар жетерлік. Форум ұйымдастырудағы басты міндет – облыстың дамуына үлес қосқан жастардың ісін үлгі етіп көрсету.
Биыл өз саласын өрге сүйреп жастардың арасында үздіктерді анықтау 7 аталым бойынша жүзеге асты. Байқауға 80-ге жуық үміткер өз құжаттарын тапсырып, бақ сынаған. Жеңіске жеткен жастарға облыс әкімінің алғысхаты мен естелік сыйлықтар және ақшалай сертификаттар табыс етілді.
Қазылар алқасының шешімімен «Жыл көшбасшысы» болып Ерасыл Өмірәлінов танылды. Сондай-ақ «Жылдың жас дарыны» Ерқанат Садуханов пен Мұхтар Қайсар аталды. «Үздік жастар ресурстық орталығы» аталымын Аягөз ауданы мен Курчатов қаласындағы жастарды бір ортаға тоғыстырып қызмет атқарған мекемелер иеленді.
«Soul Voice» жобасының авторы Ерасыл Таев «Жылдың үздік жобасы», Елдос Сейітбеков «Жылдың жас еңбек адамы», Наргиз Сүлейменова мен Аян Мәулетханов «Жылдың жас волонтері», Сағынбаевтар отбасы «Жылдың жас отбасы» аталымымен марапатталды.
Семей