Отандық кәсіпорындар өз қызметтерін жетілдіруге бағытталған шығындарының бір бөлігін өтеу түріндегі мемлекеттік ынталандыру шараларын алуды жалғастырып жатыр. Бұл бағыттағы қолдау арқылы зауыт, фабрика мен цехтар өндірісті дамыту мен жаңғыртуды жоспарлауға мүмкіндік беріп, олардың нарықтағы бәсекеге қабілеттілігін арттырады.
Осы жылдың IV тоқсанында мемлекеттік ынталандыру шаралары темірбетон бұйымдарының жетекші отандық өндірушісі – баспалдақ сатыларын, қабырғалық іргетас блоктарын шығаратын «KazConstructionGroup» компаниясына көрсетілді. Кәсіпорынның өндірістік қуаты жылына 120 мың текше метр бетонды құрайды.
«QazIndustry» компанияға мемлекеттік ынталандыру шаралары аясында технологиялық үдерістерін жетілдіруге жұмсалған 10,3 млн теңге көлеміндегі шығындарын өтеді. Бұл қаражатқа кәсіпорын жаңа жабдықтар сатып алып, өндіріс тиімділігін айтарлықтай арттырды. Нәтижесінде, компания өндірісті жаңғыртып қана қоймай, өнім сапасын жақсартып, тапсырыстарды орындау уақытын қысқартып, жаңа жұмыс орындарын ашты.
«QazIndustry ұсынған мемлекеттік қолдау шаралары біздің кәсіпорнымызды дамытуда маңызды рөл атқарды. Біз өндірістік үдерістерді айтарлықтай жақсарттық, бұл өнім көлемін арттырып қана қоймай, ел экономикасының дамуына өз үлесімізді қосуға мүмкіндік берді», деп атап өтті «KazConstructionGroup» ЖШС бас директоры Мұратбек Мұхамбедиев.
Жаңа жабдық дайын бетонды құйып, оны айналмалы қорап арқылы арнайы қалыптарға жеткізуге арналған. Бұл техника жұмыс барысын автоматтандырып, өндіріс қарқынын едәуір жеделдетті. Аталған жабдықтың арқасында бірқатар нәтижеге қол жеткізілді. Біріншіден, өндіріс көлемі 113%-ға өсті. Жаңа технологияны енгізу арқылы кәсіпорын бірдей уақытта өнімді көбірек шығара бастады, бұл қаржылық көрсеткіштердің жақсаруына ықпал етті. Екіншіден, өндірістік цикл уақыты 25%-ға қысқарды. Енді кәсіпорын тапсырыстарды жылдамырақ орындайды, бұл клиенттердің сұранысын қанағаттандыруға және нарықтағы бәсекеге қабілеттілікті арттыруға жол ашады.
Үшіншіден, жаңа жабдықтың арқасында өндіріс ауысымдылығын арттыру мүмкіндігі пайда болып, компания қосымша 10 жұмыс орнын құрды. Қазір «KazConstructionGroup» компаниясында 46 адам еңбек етеді. Төртіншіден, шығындар үнемделіп, рентабельділік артты. Жабдықтың тиімділігі 35%-ға артып, өндіріс шығындары 40%-ға дейін үнемделе бастады. Осылайша, өнімнің өзіндік құны төмендеп, компанияның пайдасы 12%-ға өсті.
«KazConstructionGroup» компаниясының нақты нәтижелері мемлекеттік ынталандыру шараларының табысқа жетудегі маңызды рөлін дәлелдейді.
«Мемлекеттің қолдауы кәсіпорынды сәтті жаңғыртуда және оның нарықтағы орнын нығайтуда шешуші рөл атқарады. Біз дамуды жалғастырып, жаңа жетістіктерге жетуге және өнім сапасын жақсартуға ұмтыламыз», деді компания басшысы.