Қарағандылық 11 жасар Платон Нечаев Сауд Арабиясында өткен ЮНЕСКО халықаралық конференциясында авторлық ертегілерін таныстырды, деп хабарлайды Egemen.kz ҚР Мәдениет және ақпарат министрлігіне сілтеме жасап.
Ол Сауд Арабиясының Жубайл қаласында өткен Оқитын қалалардың 6-шы халықаралық конференциясына (6th International Conference on Learning Cities) қатысты. Бұл алаңда тұрақты даму, климаттың өзгеруі және оқитын қауымдастықтар құру мәселелерін талқылау үшін әлемнің түкпір-түкпірінен сарапшылар жиналды.
Платон Нечаев экологиялық және әлеуметтік мәселелерді шешу арқылы креативті ойлауды дамытуға ықпал ететін, жаңа буын көшбасшыларын қалыптастыратын «PLATON 5D ойлау» білім беру бағдарламасын таныстыру үшін арнайы шақырылды.
Сонымен қатар қарағандылық оқушы конференцияға арнайы «Уақыттың сиқырлы компасы» деп аталатын жаңа ертегісін ұсынды. Платон Жубайл мен Қарағанды балалары арасында тәжірибе алмасу мақсатында екі қалада достық ағаштарын отырғызуды ұсынды.
Айта кетейік, Платон – Қазақстанның ең жас креаторларының бірі. Оның әңгімелері әртүрлі оқиғалар мен кейіпкерлерге, сүйікті қаласы Қарағандының тарихына арналған.
Жас қаламгер иллюстрацияларын жасанды интеллект көмегімен өзі жасайды екен.