Қазақстан темір жолының қауіпсіздігіне қарулы күзетке қаржыландыру мен ресурстың жетіспеуі салдарынан елеулі қауіп төніп тұр. Сенатор Геннадий Шиповских депутаттық сауалында әскерилендірілген теміржол күзетінің қызметкерлері тап болып отырған мәселені көтерді, деп хабарлайды Egemen.kz.
Депутаттың пікірінше, соңғы жылдары жүк тасымалы көлемінің өсуіне қарамастан, күзеттің тиімділігі төмен деңгейде қалып отыр. Соңғы он жылда күзет қызметкерлерінің 40%-ға қысқаруы қалған қызметкерлерге жүктемені едәуір арттырып жіберген. Бұрын, егер күзетші ауысымда орта есеппен 10-15 км жүрсе, бүгінде қызмет көрсету шартына қарамастан шамамен 20-30 км жүрді.
Геннадий Шиповских көлік инфрақұрылымын қорғау үшін қосымша ресурстар мен әскерилендірілген теміржол күзетінің мәртебесін күшейту қажет екенін атап өтті.
«Теміржолдағы қауіпсіздікті қамтамасыз етіп жүрген мекеме – ҚТЖ ұлттық компаниясының «Әскерилендірілген темір жол күзеті». 7 мыңнан астам қызметкері бар бұл мекеме, күн сайын жарылғыш материалдарды, отын мен химиялық заттарды қоса алғанда, транзиттік, экспорттық, импорттық және ішкі жүктері бар 45 мыңға жуық вагонды күзетеді. Мысалы, Қытай, Ресей, Қырғызстан, Өзбекстан, Әзербайжан және басқа да елдер бұл міндеттерді мемлекеттік бақылаудағы немесе онымен тығыз байланысты мамандандырылған құрылымдарға жүктейді. Біздің елімізде Үкімет тарапынан бұл сектор назардан тыс қалып отыр, елдің көлік-логистикалық әлеуетін дамыту және нығайту бойынша мемлекеттік саясатты толыққанды іске асыру үшін Әскерилендірілген темір жол күзетінің тиісті мәртебесі жоқ. Осыған байланысты осы компанияға қажетті мәртебе беру мәселесін пысықтауға, осы құрылымды техникалық күшейту үшін жеткілікті қаржыландырумен қамтамасыз ету мәселесін қарауға шақырамыз», деді депутат.