Бүгін Bloomberg 500 миллиардерлер тізімі жаңартылды, деп хабарлайды Egemen.kz Bloomberg басылымына сілтеме жасап.
8 қаңтардағы рейтинг бойынша әлемдегі ең бай адам – америкалық миллиардер Илон Маск атанды. Оның байлығы 426 миллиард долларға бағаланады. Екінші орында 241 миллиард доллар байлығымен Amazon иесі Джефф Безос тұр. Үшінші орынға Facebook пен Meta-ның негізін қалаушы Марк Цукерберг жайғасты, оның активтері 218 миллиард долларға бағаланды.
Сонымен қатар әлемдегі ең бай он адамның қатарына америкалық IT-кәсіпкер Ларри Эллисон, француз миллиардері Бернард Арно, Google-дің негізін қалаушылардың бірі Ларри Пейдж серіктесі Сергей Бринмен бірге, Microsoft-тың бұрынғы ірі акционері Билл Гейтс, Microsoft-тың бұрынғы директоры Стив Балмер және инвестор Уоррен Баффет кіреді.
Айта кетейік, әлемдегі ең бай адамдардың тізіміне Қазақстан кәсіпкері де енді. Владимир Ким 415-орынға тұрақтаған.
Bloomberg агенттігі Владимир Кимнің байлығын 7,11 миллиард долларға бағалаған. Жыл басынан бері ол 53,8 миллион долларға, ал соңғы 24 сағатта 15,9 миллион долларға өсті. Америкалық басылымның шолуында Кимнің Қазақстан мен Қырғызстандағы мыс өндірумен айналысатын KAZ Minerals компаниясының директоры және бұрынғы төрағасы екені көрсетілген.