Жалаң жұдырықпен күш сынасудан Алматыда өткен «Nomad Fighting Championship» 12 турнирінде Жұман Жұмабеков жарқын жеңіске қол жеткізіп, жанкүйерлерін қуантты.
Аралас жекпе-жек пен кәсіпқой боксты қатар алып жүрген қазақтың қайсар ұлы Расул Мырзаевпен айқасты. Бұл есім жанкүйерлерге жақсы таныс. «Қара жолбарыс» деген бүркеншік есіммен танылған Дағыстанның тумасы жауынгерлік самбодан әлем чемпионы, панкратионнан Әлем кубогінің иегері, жекпе-жектің сан алуан түрінен көптеген дүбірлі доданың жеңімпазы. 2009–2016 жылдар аралығында 17 мәрте октагонға шыққан Р.Мирзаев барлық бәсекеде жеңіске жетті. Қарсыласының денін айқын басымдықпен ұтты.
Расул 2013, 2014 жылдары елімізге келіп, Ержан Естановпен күш сынасты. Бұл кездесудің екеуінде де дағыстандық жеңіске жетті. 2020 жылдың көктемінде Алматы төрінде жалауы желбіреген АСА турнирінде Арман Оспанов («Сұңқар») оны жерге жығып алып, ауыр соққылардың астына алды. «Қара жолбарыстың» шарасыз күйін көрген төреші дереу жекпе-жекті тоқтатты. Кейіннен сол бәсекеде Расулдың жағы сынғаны белгілі болды.
Арада бес жыл өткеннен кейін Мирзаев Алатау баурайына қайта ат басын бұрды. «Найза» промоушені ұйымдастырған жарыста Ж.Жұмабековпен жұдырықтасты. Қандасымыз оның еркін көсілуіне еш мүмкіндік берген жоқ. Екінші раундта Жұманның жойқын соққысы қарсыласына дәл тиді, Расул тәлтіректеп қалды. Сол мезетте оған тағы бірнеше соққы жұмсап үлгерді. Мирзаевтың қорғануға шамасы келмеді. Дағыстан өкілінің әлі де ес жия алмай тұрғанын байқаған төреші араға түсті. Осылайша, Алматыдағы айқас Ж.Жұмабековтің айқын жеңісімен аяқталды.
