Жезқазған мен Сәтбаев қалаларына ортақ қоқыс полигоны салынады. Қолданыстағы полигон Жезқазған қаласынан 20 шақырым қашықтықта орналасқан. Күніне шамамен 150 тонна қоқыс төгіледі. Тау болып үйілген қоқысты өртегенде айналаға жағымсыз иіс тарайды.
Мамандар Жезқазған қаласындағы қолданыстағы полигонның санитарлық, экологиялық кодекс талаптарына сәйкес келмейтінін айтады. Биыл Жезқазған қаласының бас жоспарына сәйкес жаңадан полигон салу жоспарланып отыр. Сондай-ақ қоқыс пен қатты тұрмыстық қалдықты қайта өңдейтін шағын зауыт салынады. Зауытта жылына 50 мың тонна қағаз, пластик, резеңке бұйымдары қайта өңделеді.
Қоқыс полигоны Жезқазған мен Сәтбаев қалаларына ортақ болады. Екі қаланың ортасындағы өндірістік аумақта орналасады. Жер учаскесі бөлініп, инвестор анықталды. Жаңа полигонның негізгі аумағы 17 гектарды құрайды.
Облыстық табиғи ресурстар және табиғатты пайдалануды реттеу басқармасы басшысының міндетін атқарушы Абзал Ахметбеков: «Екі нысанды салуға шамамен 900 млн теңге қажет. Қаржының 30%-ы инвестордың өз есебінен, қалғанын өнеркәсіпті дамыту қоры лизинг түрінде береді», деп мәлімдеді.
Экологиялық кодекске сәйкес ескі полигонды жою жұмыстары жүргізіледі.
Ұлытау облысы