Павлодарлық кәсіпорындар былтыр бюджетке 672,8 млрд теңге пайда әкелген. Статистикалық деректерге сүйенсек, қазіргі уақытта облыста 62 681 шағын және орта бизнес субъектісі тіркелген.
Ертіс – Баян өңіріндегі шағын және орта кәсіпкерлік саны 2024 жылы 3,2%-ға өскен. Олардың негізгі бөлігі көтерме және бөлшек саудада (24 262 бірлік), ауыл шаруашылығы, орман және балық шаруашылығында (7 666), көлік және қоймалау (4 957), құрылыста (3 962) шоғырланған.
«Павлодар облысы бойынша Мемлекеттік кірістер департаментінің ақпаратына сәйкес, 2024 жылы кәсіпкерлік субъектілерінен бюджетке 672,8 млрд теңге түскен. Кәсіпкерлік нысандарының көбеюіне өңірде жүзеге асып жатқан мемлекеттік қолдау бағдарламаларының септігі мол. Біздің басқарма кәсіпкерлікті қолдаудың, оның ішінде пайыздық мөлшерлемені субсидиялау (қарыз алушы үшін түпкілікті мөлшерлеме 8-10%) және несиелерге кепілдік беру (кредит сомасының 50-85%-ы) бойынша қаржы құралдарының өңірлік үйлестірушісі қызметін атқарады», дейді өңірлік Кәсіпкерлік және индустриялық-инновациялық даму басқармасы басшысының орынбасары Дархан Ермағамбетов.
Кәсіпкерлерді қолдау іс-шаралары «Даму» кәсіпкерлікті дамыту қоры» арқылы, қаржыландыру екінші деңгейдегі банктер көмегімен жүзеге асырылған.
Өңірде әлеуметтік кәсіпкерлік субъектілері үшін мемлекеттік грант беру түрінде мемлекеттік қолдау да кең таралған. 5 млн теңгеге дейінгі грантты алу үшін үміткерлер kezekte.kz сайты арқылы құжат жолдайды. Конкурсқа қатысушылардың дені – «Бір ауыл – бір өнім» бағдарламасының финалистері мен әлеуметтік кәсіпкерлік субъектілері.
«Ауыл аманаты» жобасы шеңберінде де кәсіпкерлер үшін шағын несиелер беріліп келеді. Несиенің ең ұзақ мерзімі – 5 жылға дейін, мал шаруашылығы саласындағы жобалар үшін 7 жылға дейін ұзартылған. Ең көп сомасы – 2 500 АЕК. Ауыл шаруашылығы кооперативтерін дамыту үшін 8 000 АЕК-ке дейін рәсімдеуге болады. 400 АЕК-ке дейінгі гранттар және жастарға 2,5%-бен несие беруге қатысты бағдарламалар да өз кезегімен жүріп жатыр», деді басқарма өкілі.
Ертіс – Баян өңірінде ресейлік компаниялармен бірлескен 860-тан астам кәсіпорын жұмыс істейді. Олар негізінен машина жасау, металлургия, химия, тамақ өнеркәсібі және сауда-саттық салаларында тіркелген («Railways Systems KZ», «Вектор Павлодар», «Rossdorcom KZ» және «Kazcenospheres»). Ресейлік компаниялар өздерінің сауда орталығы, филиалы мен өкілдіктерін Павлодар, Екібастұз, Ақсу қалаларында ашқан.
Павлодар облысы