ЖҰЛДЫЗШЫ ЖОРАМАЛЫ

Ыстық – табиғи құбылыс Шілдеге жетпей шыжып кеткен биылғы жаз халқымызды біршама абыржытып жіберді. Оның себебін білмеген көпшілік әртүрлі, сан-саққа жүгірткен болжамдар айтып, сәуегейлік жасап жатыр. Осындайда қайтсе де танылып қалуға тырысатын кейбір пысықайлар мұны ақырзаманның анық белгісі дейтін де болыпты. Бірақ оң болжам жасап, сенімділігі күш­ті ой айтушылар да жоқ емес. Сондайлардың бірқатары оны былтырғы қыстың ерекше суық болғанымен байланыстырады. “Қыс суық болса, жаз ыстық болады” деген қағидаттың көрінісі деседі олар. Біз редакциямызға келген танымал жұлдызшы Назарбек ҚОЖАМСЕЙІТОВТІ әңгімеге тартып, аталған мәселе төңірегінде сұрастырған едік: – Ыстықтан қорқатын ештеңе жоқ, бұл – табиғаттың көлденең апатсыз қарапайым ерекшеліктерінің бірі ғана. Оны былтырғы қыстың ерекше суық болғанымен байла­ныс­тыру орынды. Табиғатта бәрі де тең­герімді, қыстың суы­ғы әдетте жаздың ыс­тығымен шығады. Шілде айының алғаш­қы онкүндігі де ыстық болады. Айдың 9-10-ы кезінде ғана ауа райы біршама салқындап, қысқа мерзімді нөсер жаңбыр­лар жауады. Одан кейін қайтадан күн ысып, 22-лерінде жаңбыр жауу қайталанады, сол кезде ауа райы да аздап салқындайды. – Астық шығымдылығы қалай болмақ, биыл солтүстікте көп уақыт жауын жаумай, жұрттың бәрі тасаттық беріп жатқан көрінеді ғой... – Тасаттық берген дұрыс, ол да Алла­ға табынудың жолы. Астық шығымды­лығы шамалы болатыны қазірдің өзінде білініп қалды. Менің болжамым бойын­ша, жыл­дағы орташа түсімнің 22-25 пайызын­дай ғана астық алынады. Бірақ соның өзі елі­мізге толық жетеді. Былтыр­ғы мол астық­тың әлі күнге өтпей, қамба­ларда жатқанын ес­керсек, иншалла, еліміз нансыз қалмайды. – Қазір еліміз қала күні мерекесінің қарсаңында тұр. Мереке күнгі ауа райы қалай болар екен? – Өте тамаша болады, оған толық сенімім бар. Аспан ашық, жарқырап тұр­ған күннің астында халық тамаша көңіл-күйде болады. – Ал “ақырзаман болады” деген бол­жам­­дар сіздіңше қаншалықты шындыққа сәйкеседі? – Ол – бос сөз. Біздің ғалам­шарымыз 2011 жылы 25940 жылда бір болатын галакти­кадағы құбылысқа тап болғалы тұр. Ол күні біршама уақыт күн тұтылып, жер бе­тін тұта­сы­мен қараң­ғылық басады. Бірақ одан еш­қандай қор­қыныш жоқ. Соны кей­біреу­лер “ақырзаман” деп қорқытатын бо­лып­ты. Дегенмен, адамдарға ынсап керек. Қай күнде адам құдайын ұмытпай, аман-есен, ауырмай-сырқамай, түрлі қай­ғыға ұшырамай аман өмір сүріп жатқанына тәубе­шілік жасап отырса, Алла да құр тастамайды. Бірақ кей­біреулердің ынсап­сыздығы жағаң­ды ұстата­ды. Әнеукүні шығыста болған тас­қында бір оңбағандар бір пар етікті бір қойға сатыпты. Сөйтіп, жұрт қайғы жұтып жатса, олар жұрттың қайғысынан ақша таппақ болыпты. Осындай ынсапсыздықтан сақтану керек. – Алдағы күздің болжамы қандай? – Биылғы күз де жақсы болады. Бағ­бан­дар тамыз айындағы үсіктен қорқатын еді, биыл ондай болмайды. Тек жиын-терімнің бәрін қазанның 10-ына дейін бітіру керек, өйткені одан әрі ұзақ мер­зім­ді күздің қара жауындары басталады. – Әңгімеңізге рахмет, Назеке... – Е, құр рахметке тойдық қой, осы­ның бәрін ақшаға сатып алу керек қой, бірақ ешкім де менің еңбегімді елеп, ақы төлегісі келмейді. Бәрін де тегін алғысы келеді. Қазіргі заманда ондай болмайды ғой. Мен Алматының ауасын тазарту әдісінің жобасын да жасап қойдым, соны әкімдікке ұсынсам, еш жауап жоқ. Бәрі ақы төлеуден қашады... Ал Ресейдің “Гидрометцентрі” ынтымақ­тастық жасайық, бізге кел деп отыр... Әңгімелескен Жақсыбай САМРАТ.