«Бас редакторлар клубы» республикалық қоғамдық бірлестігінің мүшелері хабты аралап, оның мүмкіндіктері мен ұсынатын қызметтері жайлы мол мағлұмат алды, деп хабарлайды Egemen.kz.
28 наурыз күні «ÓzgeEpic» креатив хабында «Ғылыми кеш» жобасы аясында ҚР Парламенті Сенатының депутаты, Ұлттық Құрылтай төрағасының орынбасары, медиаменеджер, белгілі журналист Бибігүл Жексенбайдың «Медиадағы коммуникация: Ақпарат тасқынындағы дәлдік пен жауапкершілік» тақырыбындағы ашық дәрісі өтті.
Іс-шара барысында заманауи медиадағы ақпараттық ағынның қарқындылығы, қоғам санасына әсері, коммуникация сапасы мен этикасы туралы маңызды мәселелер қозғалды. Дәріс аясында қатысушыларға медиа саласында кәсіби біліктілігін арттыру, коммуникация құралдарын тиімді қолдану және ақпаратты жауапкершілікпен тарату жолдары айтылды.
Сонымен қатар, спикер өз сөзінде қазіргі ақпарат дәуірінде медиа мамандары мен журналистерге қойылатын талаптар, ақпаратты дұрыс талдау мен бағалаудың маңыздылығы туралы келесі маңызды мәселелерді атап өтті:
«Әлеуметтік медиа мен жасанды интеллект күнделікті өміріміздің ажырамас бөлігіне айналды. Бұл өзгеріс шындықтың табиғатын да өзгертті — енді ол әлдеқайда күрделі, көпқырлы және сан түрлі интерпретацияларға ашық құбылыс ретінде көрініс табады. Алдағы уақытта біз осы көзқарастар мен түсіндірмелерді жан-жақты талдауға назар аударатын боламыз.»
«Заманауи технологиялар әрбір адамға жеке білім алуға және өзін-өзі дамытуға мол мүмкіндік береді. Бұл — үлкен артықшылық. Сондықтан тек балаларға емес, ересектерге де үздіксіз білім беру аса маңызды. Дегенмен, жаңа дәуірдің құндылықтарын жас ұрпақтың бойына ерте жастан сіңіру ерекше мәнге ие.»
Соңғы онжылдықта технологияның қарқынды дамуы көптеген салаларға ықпал етіп, жұмыссыздықтың артуына қатысты алаңдаушылық туғызғаны белгілі. Осыдан 10-12 жыл бұрын технологиялық прогресс дәстүрлі мамандықтарды ығыстырып, әсіресе журналистика саласына қауіп төндіруі мүмкін деген пікірлер айтылды. Алайда уақыт бұл болжамның орынсыз екенін көрсетті. Технология қаншалықты алға жылжыса да, кәсіби журналистикаға деген сұраныс кеміген жоқ. Керісінше, қоғамда сенімді ақпаратқа деген мұқтаждық артып, білікті журналистердің еңбегі бұрынғыдан да маңызды бола түсті.
Журналистиканың өзгермелі табиғатын ескерсек, кәсіби журналист қандай болуы керек деген сұрақтың өзектілігі артып келеді. Бұл сұраққа мән бермеу – үлкен қателік. Себебі дәл осы сұрақты қою – болашақта мықты журналист болуға жасалатын алғашқы әрі маңызды қадам. Жақсы журналист болу үшін кәсіби дағдыларды меңгерумен қатар, өзіндік ұстаным мен бағытты дұрыс қалыптастыру қажет. Сондықтан әр журналист осы сұрақты өзіне қойып, өз қызметінің мақсаты мен құндылықтарын айқындауға тиіс.
Заманауи журналистикада технологиялық мүмкіндіктерді жетік меңгеру маңызды фактор екені анық. Дегенмен, кәсіби журналист үшін ең бастысы – сыни көзқарас. Журналист кез келген оқиғаның ортасында болып, үнемі “Неге?” деген сұрақ қойып, оқиғаның астарына терең үңілуі керек. Себебі әр адам шындықты өз көзқарасымен қабылдайды. Ал журналистің міндеті – осы түрлі көзқарастарды сараптап, оқиғаның әр қырын зерттеп, аудиторияға шынайы әрі толыққанды ақпарат ұсыну. Тек осылай ғана кәсіби журналистің сөзі құнды әрі беделді болмақ.
Ақпараттық ағынның қарқынды артуы медиасауаттылық мәселесін күн тәртібіне шығарды. Медиасауаттылық пен сыни ойлау дағдысын қалыптастыруда контенттің сапасына ерекше көңіл бөлінуі қажет. Бұл ретте қоғамның ақпараттық мәдениетін қалыптастыру тек ересектермен ғана шектелмеуі тиіс. Балабақшадан бастап балаларға елдің тарихы, ұлттық мүдде мен құндылықтар туралы ақпаратты олардың жас ерекшелігіне сай, түсінікті әрі қабылдауға жеңіл формада жеткізу аса маңызды. Жас ұрпақтың бойына дұрыс құндылықтар мен саналы ойлау жүйесін қалыптастыру – қоғамның болашағына салынған маңызды инвестиция.
Іс-шараға медиа мамандары, журналистика студенттері және ақпараттық кеңістікке қызығушылық танытатын тұлғалар қатысты. Дәріс барысында қатысушылар медиадағы жауапкершілік, жалған ақпаратпен күрес тәсілдері, цифрлық медианың жаңа мүмкіндіктері мен қауіптері, сондай-ақ жасанды интеллект технологияларын игеру сияқты өзекті мәселелер бойынша құнды мағлұмат алды.
Журналистика саласындағы мол тәжірибесі негізінде Бибігүл Жексенбай кәсіби журналистің жаңа дәуірдегі міндеттері мен құндылықтары туралы ой бөлісіп, жас мамандарға маңызды кеңестер берді.