АСТАНА. 22 маусым. «Әлеуметтік жобалар» корпоративтік қоры қамқорлар кеңесінің шешімімен «Барыс» хоккей командасының бас жаттықтырушысы болып Ерлан Сағымбаев тағайындалды. Аталған кеңестің төрағасы Асқар Мамин жаңа жаттықтырушының алдағы жұмысына сәттілік тіледі. Бұл туралы «Барыс» командасының баспасөз қызметіне сілтеме жасаған egemen.kz хабарлады.
Ерлан Ерлесұлы 1970 жылы 5 сәуірде қазақ хоккейінің ұстаханасы – Өскемен қаласында туған. Жергілікті «Торпедо» командасының түлегі. Одан бөлек, «Автомобилист» (Қарағанды), «Авангард» (Омбы), «Металлург» (Новокузнецк) және «Сибирь» (Новосибирск) хоккей командаларында тер төкті. Сондай-ақ, 1998 жылы Наганода (Жапония) өткен қысқы Олимпиадада Қазақстан құрамасының капитаны болды. Ұлттық құрама сапында екі дүркін қысқы Азия ойындарының жеңімпазы атанды (1996 және 1999 жж.).
Ойыншы ретінде спорттық мансабын 2001 жылы аяқтаған Е.Сағымбаев содан бері шәкірт тәрбиелеумен айналысып келеді. Осы аралықта «Казцинк-Торпедо» (Өскемен), «Сарыарқа» (Қарағанды), «Ертіс» (Павлодар) командаларын және ұлттық құраманы жаттықтырды. Одан бөлек, «Снежные барсы» және «Барыс» командалары жаттықтырушылар құрамының мүшесі болды. Шайбалы хоккейден халықаралық дәрежедегі спорт шебері. Қазақстанның еңбек сіңірген жаттықтырушысы.
Айта кетейік, «Барыстың» бұрынғы бас жаттықтырушысы Андрей Назаров Санкт-Петербургтің СКА командасына кетіп қалған болатын.
Еламан Қоңыр.
Дерек, сурет: «Барыс» хоккей командасының баспасөз қызметі.