Қазақстандық мәнерлеп сырғанаушы, Олимпиялық ойындардың қола жүлдегері Денис Тен Оңтүстік Кореяның астанасы Сеул қаласында мәреге жеткен «төрт құрлық турнирінде» бірінші орынды жеңіп алды.
Алдымен қысқа бағдарламада 97,61 ұпаймен топ басына шыққан Денис еркін бағдарлама сайысында да алдына жан салмады. Барлық жаттығуларын жоғары деңгейде орындаған ол 191,85 ұпай алып, қос жаттығудың қорытындысында 289,46 балл жинады. Сөйтіп, «төрт құрлық турнирінде» бас жүлдегер атанған бірінші қазақстандық спортшы атанды.
Айта кететін жайт, бұл осы маусымдағы ең үздік нәтиже болды.
Турнирде АҚШ сенімін арқалап келген Джошуа Фаррис жарыста 260,01 ұпаймен екінші орын алса, қытайлық Янь Хань қола жүлдеге қол созды. Бұлардың біріншісі 260,01 балл жинаса, екіншісінің жетістігі 259,47 ұпайға теңесті.
Жарысқа қатысқан тағы бір жерлесіміз Абзал Рахымғалиев 168,10 ұпаймен турнир кестесінің 20-орнына жайғасты.
Енді Денис Тен наурыз айында Қытайдың Шанхай қаласында өтетін әлем чемпионатына қатысатын болады.
Дамир ҚОЖАМҚҰЛ.