ТУ — ЕЛДІКТІҢ БАСТЫ БЕЛГІСІ

ЕЛОРДА МЕН ЕЛБАСЫ – ЕГІЗ ҰҒЫМ Туған күніңмен, еңсесі биік Елорда! Туған күніңізбен, елі сүйген, елін сүйген Елбасы! Асқақ рух пен елдіктің айбынды нышаны болып табылатын  Мемлекеттік ту “Атамекен” этно-мемориалды кешенінде шілденің 4-інде Елбасының қатысуымен көкте желбіреді. Туды  көтеру салтанатты рәсімі Астана күнін мерекелеудің ресми түрде басталғанын білдірді. – Мемлекеттік ту қашанда ай­рықша маңызды оқиғаның құр­ме­тіне көтеріледі. Бас байрағымыздың бүгін елорда көгіне шарықтай көтерілуі – Астана күніне арналған мерекелік шаралардың ресми түрде басталуын білдіреді. Астананың 10 жылдық мерекесінен бері бұл ізгі шара игі дәстүрге айналып келеді. Біз бүгін осы жерден асқақ Аста­намыздың он екі жылдық мере­ке­сін ресми түрде бастағалы тұрмыз. Жыл – он екі айдан тұрады. Ба­ба­лар ұстанған жыл қайыру дәстүрі бойынша, он екі жыл – бір мүшел­ді құрайды. Халқымыз бағзыдан мүшел жасқа ерекше мән берген. Бүгін, міне, Астана осы мүшел жасына жетті! Түптеп келгенде, он екі жыл – тарих үшін тым қысқа уақыт. Он екі жасқа толған бала мүшел жасқа енді жетіп, оң-солын жаңа тани бастайды, – деп бастады сөзін Елбасы. Ал Астана осы жылдар ішінде сәулетіне дәулеті келіскен іргелі ор­талыққа, әлемдік саясат пен руха­нияттың құтты ордасына айналды. Ту –  тәуелсіздік пен тұтас­тық­тың тұғырлы өлшемі, азаттықтың айрылмас бөлшегі! Сондықтан ол ежелден елдіктің басты белгісі бо­лып есептелген! Осы Бас бай­рақ­тың астында Қазақстан Қарулы Күштерінің жас сардарларына жаңа әскери шендер тапсырылады. Мұ­ның да символдық мәні зор, деп жалғады сөзін Президент. Туды кие тұтып, айрықша қастерлеу – арғы аталарымыздан тамыр тартқан арналы дәстүр. Сүйінбай ақын айтқандай, батыр бабаларымыз “бөрілі байрақ” астында бас қосып, бөлінбес елдің бірлігін бекемдеген. Ұлы жорықтарда аруақты батырына байрағын ұстатқан. Туға қарап жауынгерлер жігерін жаныған, на­мысын қайраған. Желбіреген жалау жаужүрек батырлардың рухын оят­қан. Бұл бүгінгі ұрпаққа өнеге бо­луы тиіс. Егемен елдің ерлері көк байрақтың қадір-қасиетін жете се­зінулері қажет. Алтын күн астында азат қыраны қалықтаған көк бай­рақтың ашық аспанымызда жел­біреуі бүгінгі батырларымызға ерек­ше күш беретіні анық. Ту – ел бір­лігінің символы. Халқымыз қандай кезеңде де бір тудың төңірегіне топтасып, ерлік пен елдіктің жа­сам­паз үлгісін көрсеткен. Байрағын жықпай, елі мен жерін ұрпақтан ұрпаққа аманаттаған. 1998 жылы елорда барша әлем­ге паш етілгенін тілге тиек еткен Елбасы қазір Астананың танымас­тай өзгергенін ерекше мақтаныш сезімімен айтты. Әр күн сайын мұнда Астананы көру үшін қазақ­стандықтар мен шетелдіктер ке­луде. Орталық Азияның негізгі мегаполисі болып табылатын елордада жаһандық халықаралық кез­десулер, құрылтайлар мен кон­ференциялар өткізілуде. Осы ретте Мемлекет басшысы қаланың елі­міз экономикасындағы үлесінің артқанын атап өте келіп, жалпы өңірлік өнім 1 триллион 300 мил­лиард теңгеге жеткенін алға тартты. Өндірістік өнім көлемі 9 есе, ал негізгі капиталға салынған ин­вес­тиция 18 есе өсіп, құрылыс көлемі де осыншама есе артқан, деді Нұр­сұлтан Әбішұлы. Шынында да, елді индустрия­лан­дыру бағдарламасы жүзеге асырылуда. Ең бастысы – Қазақстанның Туы мен Әнұранын барлық әлем таниды. Елбасы осы орайда еліміздің танымал болуы халықаралық бастамаларымыз бен ЕҚЫҰ сияқты беделді ұйымға төраға болуымызда екендігін де ескерте кетті. Он екі жыл ішінде елорда арқа төсінде өркен жайып, тамсана қарайтын көрікті шаһарға айналды. Зәулім ғимараттар қала тұрғындары мен келушілердің көзайымы болып отыр. Ал көк байрағымыз осындай әсем Астанамыздың кез келген же­рінен көрінеді. Төбемізде желбіре­ген көк байрақ әрбір қазақ­стан­дық­тың бойына зор мақтаныш пен рух ұя­латып қана қоймай, өскелең ұр­пақ­қа отансүйгіштік қасиет те дарытады. Нұрсұл­тан Назарбаев ҚР ҰҚК әскери институтының үлгілі түлек­те­ріне лейтенант погонын табыс етті. Асқар ТҰРАПБАЙҰЛЫ.