Әлемдегі ең биік тау Гималайда болса да, ғарышқа ең жақын нүкте Эквадордағы Чимборасо шыңы.
Жер экватор тұсында дөңес болып келеді. Сол себепті 6 263 метр Чимборасо биіктігі географиялық тұрғыдан Жердің ортасынан ең алыс, ғарышқа ең жақын орналасқан. Осы шыңға көтерілген адам өзін басқа әлемге өткендей сезінеді екен. Тауға шыққан туристер: «Айнала қалың ақ тұман. Атмосфераның келесі қабатына өткендей боласың» деп сипаттайды. Эквадордың ұлттық рәмізіне айналған Чимборасо география мен табиғаттың таңғаларлық бір ғажайыбы.